४१ जना कोरोना संक्रमितको स्वास्थ्य अवस्था सामान्य

काठमाडौं । स्वास्थ्य तथा जनसङ्ख्या मन्त्रालयले गत चौबीस घन्टामा कोरोना भाइरसको परीक्षण १ हजार ६ सय ८२ पुगेको जानकारी दिएको छ।

पिसिआरबाट १२ हजार ११ जनाको कुल परीक्षण भएको हो भने र्‍यापिड टेस्टबाट ४६ हजार ८ सय ६० जनाको परीक्षण भएको हो।

योसँगै कोरोना भाइरसको कुल परीक्षण ५८ हजार ८ सय ७१ पुगेको छ।

स्वास्थ्य तथा जनसङ्ख्या मन्त्रालयको नियमित ब्रिफिङका क्रममा बिहीबार प्रवक्ता डा. विकास देवकोटाले यसबारे जानकारी दिएका हुन्।

यस्तै हाल देशभर २३ हजार ३ सय ३६ जना क्वारेन्टाइनमा रहेको उनको भनाइ छ।

आइसोलेसनमा भने कुल ८० जना रहेको जसमा उपत्यकाभित्र ३ जना र उपत्यका बाहिर ७७ जना रहेको उनले जानकारी दिएका छन।

यस्तै रेडजोनमा देशभर ३ सय १२ जना रहेका छन जसमा गत चौबीस घन्टामा २ जना रेड जोनमा परेका हुन्।

डा. देवकोटाका अनुसार हाल कोरोना भाइरस संक्रमितको संख्या भने ५७ नै छ, जसमध्ये १६ जना निको भएर घर फर्किसकेका छन्। त्यस्तै धनगढीमा १ जना,भरतपुरमा १ जना, वीरगञ्जमा ८ जना र विराटनगरमा ३१ जना गरी कुल ४१ जनाको उपचार भइरहेको छ। डा. देवकोटाका अनुसार उपचारमा रहेका सबैको स्वास्थ्य अवस्था सामान्य रहेको छ।