प्रतिपक्ष विवाद : राष्ट्रियसभा पनि प्रभावित हुने संकेत

काठमाण्डौंः प्रतिनिधिसभामा सत्तापक्ष र प्रतिपक्षबारे कांग्रेस र एमालेबीचको विवादले राष्ट्रिय सभाको बैठक पनि प्रभावित हुने देखिएको छ। गत १५ गते एमाले माओवादी गठबन्धन भत्किएर पुनः नेपाली कांग्रेस, माओवादी केन्द्रसहितको आठ दलीय गठबन्धन बनेपछि फागुन १७ गते बोलाइएको प्रतिनिधिसभा बैठकमा कांग्रेस र एमाले दुवैले प्रतिपक्षमा बस्ने अडान लिएका थिए। जसले गर्दा संसद् सचिवालयले सूचना निकालेर बैठक स्थगित गरेको थियो।

राष्ट्रपतिको निर्वाचनअघि सरकार विस्तार नहुने देखिएको छैन। राष्ट्रपतिको निर्वाचन यही फागुन २५ गते हुँदैछ। कांग्रेसले सरकारमा नगईकन सत्तापक्षमा नबस्ने बताएको छ। विवादका कारण प्रतिनिधिसभाको बैठक चैत ५ गतेसम्मका लागि स्थगित भएको छ।

कांग्रेसका सांसद प्रकाश पन्तले राष्ट्रियसभाको २९ गतेको बैठकमा पनि प्रतिपक्षमा बस्ने संकेत गरेका छन्। सरकारलाई दिएको विश्वासको मत फिर्ता लिएपछि एमालेले पनि प्रतिपक्षमै बस्ने बताएको छ। एमाले राष्ट्रियसभा संसदीय दलका नेता भैरवसुन्दर श्रेष्ठले एमालेले विश्वासको मत फिर्ता लिइसकेपछि अब प्रतिपक्षमा बस्ने जानकारी दिएका हुन्। सत्तापक्ष र प्रतिपक्षको विवाद भए राष्ट्रियसभा अध्यक्षले बैठक स्थगित गर्न सक्ने अधिकार हुँदा २९ गतेको बैठक प्रभावित हुन सक्ने देखिएको छ।

कांग्रेसले सरकारमा नगएसम्म सत्तापक्षमा नबस्ने नीति लिएको छ। उपराष्ट्रपतिको निर्वाचनपछि मात्र कांग्रेसले सरकारमा जाने संकेत गरेको छ। उपराष्ट्रपतिको निर्वाचन आगामी चैत ३ गतेका लागि तोकिएको छ।

प्रधानमन्त्री पुष्पकमल दाहालले राष्ट्रपतिको निर्वाचनअघि नै दलबाट एकएक जना पठाएर भए पनि मन्त्रिपरिषद् विस्तार गर्ने तयारी थालेको स्रोतले बतायो। स्रोतका अनुसार सरकार गठन हुनासाथ दलहरूबीच असन्तुष्टि चुलिन गए राष्ट्रपतिको निर्वाचनमा कांग्रेसको हार हुन सक्ने आकलन गर्दै सरकार विस्तारलाई अस्वीकार गरेको थियो। यसकारण अब राष्ट्रपति र उपराष्ट्रपतिको निर्वाचनपछि नै सरकार गठन हुन सक्ने सम्भावना देखिएको स्रोतको भनाइ छ। नागरिक