लुम्बिनीमा पीस ओपन हाफ म्यारथन प्रतियोगिता हुने

काठमाण्डौंः रुपन्देहीको लुम्बिनीमा लुम्बिनी पीस ओपन महिला तथा पुरुष हाफ म्यारथन प्रतियोगिता हुनेभएको छ । अन्तर्राष्ट्रिय खेलकुद दिवसको अवसरमा शान्ति र समृद्धिका लागि खेलकुद भन्ने नाराका साथ मदन भण्डारी स्पोर्टस् एकेडेमीको आयोजनामा राष्ट्रिय भेला तथा प्रतियोगिता हुनेछ ।

सो कार्यक्रमको उदघाटन पूर्वप्रधानमन्त्री तथा एमाले अध्यक्ष केपी शर्मा ओलीले गर्ने कार्यक्रम रहको बुटवलमा पत्रकार सम्मेलनको आयोजना गरी जानकारी दिइएको छ ।

लुम्बिनी पीस ओपन महिला तथा पुरुष हाफ म्याराथुन प्रतियोगिता लुम्बिनीस्थित अन्तर्राष्ट्रिय सभा हल तथा मेडिटेसन सेन्टरमा हुनेछ । हाफ म्याराथनको दूरी २१ किलोमिटर हुनेछ । प्रतियोगितामा सहभागी हुन चाहनेहरुले २० चैतसम्म दर्ता गर्नुपर्ने आयोजकले बताएको छ ।

म्याराथन प्रतियोगितामा जिल्ला बाहिरका सहभागी खेलाडिलाई आवासको व्यवस्था गरिएको एकेडेमीका अध्यक्ष धुब्र आचार्यले बताउनुभयो । म्याराथानतर्फ प्रथम हुने पुरुषले एक लाख ५० हजार, द्वितीय हुनेले ७५ हजार, तृतीय हुनेले ५० हजार, चौथो हुनेले ३० हजार प्राप्त गर्नेछन् ।

त्यसैगरी पाँचौ हुनेलाई २० हजार, छैंठौ हुनेलाई १० हजार, सातौं हुनेलाई ७ हजार, आठौं हुनेलाई पाँच हजार, नवौं र दशौं हुनेलाई पाँच–पाँच हजार दिने उहाँले बताउनुभयो ।

त्यसैगरी महिलातर्फ प्रथम हुनेलाई १ लाख ५१ हजार प्राप्त गर्नेछन् । त्यसैगरी द्वितीय हुनेलाई ७५ हजार, तृतीय हुनेलाई ५० हजार, चौथो हुनेलाई ३० हजार, पाँचौ हुनेलाई २० हजार, छैठौं हुनेलाई १० हजार, सातौं हुनेलाई ७ हजार, आठौ, नवौ र दशौं हुनेलाई पाँच–पाँच हजार दिने आयोजकको भनाइ छ । प्रतियोगितामा सयौँको सहभागिता रहने आचार्यको भनाइ छ । २०६६ पुस १७ गते स्थापना भएको मदन भण्डारी स्पोर्टस एकेडेमीले राष्ट्रिय तथा अन्तर्राष्ट्रिय खेल प्रतियोगिता र खेल गतिविधि गर्दैआएको छ ।