अमेरिकाले ताइवानसँग वार्ता गर्ने

काठमाण्डौंः चीनको चेतावनीका बाबजुद अमेरिकाले ताइवानसंग वार्ता गर्ने भएको छ । अमेरिकी सदनका सभामुख केभिन म्याकार्थीले यसै साता क्यालिफोर्नियामा ताइवानका राष्ट्रपति साइ इङ्ग–वेनलाई भेट्ने पुष्टि गर्नु भएको अन्तराष्ट्रिय सञ्चारमाध्यमले जनाएका छन् ।

चीनको चेतावनीका बाबजुद हुन लागेको वार्ताले गम्भीर टकराव निम्त्याउन सक्ने विश्लेषण गरिएको छ । पछिल्लो समय अमेरिका र चीनको सम्बन्ध चिसिदैं गएको छ । जासुसी बेलुन र चीनको उन्नत प्रविधिमा पहुँच बन्द गर्ने अमेरिकी प्रयासलाई लिएर विवाद भएपछि तनाव बढेको छ ।

बेइजिङले ताइवानका राष्ट्रपति साई र अमेरिकी अधिकारीबीचको कुनै पनि भेटले गम्भीर परिणाम हुन सक्ने चेतावनी दिएको थियो । हिजो मात्र चिनियाँ विदेश मन्त्रालयका प्रवक्ताले बेइजिङले अमेरिका र ताइवान सरकारहरू बीचको कुनै पनि प्रकारको आधिकारिक अन्तरक्रिया र सम्पर्कको कडा विरोध गर्ने बताउनु भएको थियो ।

अमेरिकाले बेइजिङसंग पूर्ण कूटनीतिक सम्बन्ध कायम राखेपनि ताइवानको भने महत्त्वपूर्ण सहयोगी र हतियार आपूर्तिकर्ताका रुपमा चिनिन्छ । सन् २०१६ मा साई राष्ट्रपतिमा निर्वाचित भएदेखि बेइजिङले सो टापुमा सैन्य, आर्थिक र कूटनीतिक दबाब बढाएको छ । एजेन्सी