सार्वजनिक सवारी साधनको भाडा बढ्यो (सूचीसहित)

काठमाडौंः इन्धनको मूल्य बढाएसँगै सरकारले सार्वजनिक सवारी साधनको भाडा पनि बढाएको छ । अन्तरप्रदेश चल्ने सार्वजनिक यातायात तथा मालबाहक सवारीको भाडा यातायात व्यवस्था विभागले करिब ५ प्रतिशतसम्म बढाएको हो ।

विभागले सार्वजनिक गरेको सूचना अनुसार आजैबाट लागू हुने गरी यात्रुबाहक सवारीमा ४.७० प्रतिशत भाडा बढेको छ । विभागले पहाडी बाटोमा सञ्चालन हुने मालबाहक सवारीमा ६.१५ र तराईको बाटोमा सञ्चालन हुने सवारीमा ६.८३ प्रतिशतसम्म सवारी भाडा बढेको  जनाएको छ ।

बढेको भाडादर आजैदेखि लागू भएको छ । विभागका अनुसार यो भाडा दुई वा दुईभन्दा बढी प्रदेश अथवा राष्ट्रियस्तरमा सञ्चालन हुने सार्वजनिक गाडीमा मात्र लागू हुने भएको छ ।

नेपाल आयल निगमले हिजो मङ्गलवार पेट्रोलमा प्रतिलिटर पाँच रुपैयाँ र डिजल तथा मट्टीतेलमा प्रतिलिटर १४ रुपैयाँ बढाएको थियाे ।