तराई मधेशमा छठ पर्वको तयारी सुरु

काठमाण्डौंः दीपावलीको मुख्य आकर्षक लक्ष्मी पूजा सम्पन्न भएसँगै वीरगन्ज लगायत तराई मधेशका जिल्लाहरूमा छठ पर्वको तयारी सुरु भएको छ ।

बारा, पर्सा, रौतहट लगायत भोजपुरा संस्कृतिको केन्द्रको रूपमा रहेको वीरगन्जमा दीपावलीसँगै छठ पर्व उत्साह र उमङ्गका साथ मनाइने गरिन्छ । वीरगन्जमा दीपावली अर्थात् लक्ष्मी पूजा भव्य रूपमा मनाईएको र दीपावली सकिएसँगै छठ पर्वको तयारीमा सर्वसाधारण जुटेका छन् ।

दीपावलीमा तराई मधेशमा लक्ष्मी पूजापछि छठ पर्वको तयारी हुने गर्दछ । अहिले वीरगन्जको घण्टाघर र माइस्थान क्षेत्रमा छठ पर्वमा प्रयोग हुने माटाका पूजा सामग्री दियो,पाला, आदि बेच्नेहरूको भिड लागेको छ । लक्ष्मी पूजापछि अहिले वीरगन्ज महानगरपालिका सहित स्थानियपालिकाहरु, विभिन्न सामाजिक सङ्घ संस्थाहरूले छठ घाटको सरसफाइ र शृङ्गारको काम सुरु गरी सकेका छन् ।

छठ पर्वका लागि वीरगन्जको सबैभन्दा ठूलो तथा प्रसिद्ध घाट घडिअर्वा पोखरी परिसरलाई पनि सजाउने काम धमाधम भई रहेको छ । घडिअर्वा पोखरी सँगै वीरगन्जको रानीघाट, छपकैया, मुर्ली, नगवा, लक्ष्मणवा, राधेमाई टोलमा रहेका दुई दर्जनभन्दा बढी छठ घाटहरू सजाउने काम तीव्र रूपमा भई रहेको छ ।

तराई मधेशमा दीपावली र छठ पर्वलाई विशेष रूपमा मान्ने चलन रहेको बताउँदै वीरगन्ज महानगरपालिका वडा नम्बर ४ निवासी सुशिल जोशीले वीरगन्ज लक्ष्मीको नगरी र मुलुककै आर्थिक राजधानी मानिने भएकाले पनि यहाँ दीपावली पर्व भव्य रूपमा मनाइने र त्यसपछि छठको तयारीमा स्थानीय जुट्ने गरेको बताउनु भयो ।

तिहार र छठ दुवै पर्वले समग्र तराई मधेशकै अर्थतन्त्रलाई चलायमान समेत बनाएका छन् । यी पर्वमा पूजा सामग्री देखि लिएर नयाँ कपडा, जुत्ता, बास तथा माटाका सामान, फलफूलको विक्री वितरण तीव्र रूपमा हुने गर्दछ ।

यसैबिच छठ पर्वको तयारीका लागि आज वीरगन्ज महानगरपालिकाका नगर प्रमुख राजेशमान सिंह सहितको टोलीले महानगर भित्रका विभिन्न धार्मिक स्थल एवं छठ घाटको स्थलगत अनुगमन र अवलोकन गरेको छ । वीरगन्ज महानगरपालिकाको विभिन्न वडामा रहेका छठ घाटहरूको स्थलगत अवलोकन गरी सरसफाइ र तयारीका सम्बन्धमा थप जानकारी लिएको नगरप्रमुखको सचिवालयले जनाएको छ ।