भारत-चीन सीमा विवाद : भारतीय रक्षामन्त्री राजनाथ सिंहद्वारा तीनवटै सेना प्रमुखसँग छलफल

एजेन्सी । भारत चीन सीमा विवाद उत्कर्षमा पुगेपछि भारतीय रक्षामन्त्री राजनाथ सिंहले आज तीनवटै सेना प्रमुखसँग छलफल गरेका छन् । पूर्वसेना प्रमुख तथा सिडिएस बिपिन रावत पनि छलफलमा सहभागी भएका भारतीय सञ्चारमाध्यमले जनाएका छन् । बैठकमा लद्दाखको पछिल्लो विवाद र सैन्य उपस्थितिलगायतका विषयमा चर्चा भएको छ ।

रक्षामन्त्री सिंहले पहिले पनि तीनवटै सेना प्रमुखसँग छलफल गरेका थिए । लद्दाखमा भारत र चीनका सेनाबीच हिंसात्मक झडप भएपछि अहिले जल, थल र वायु सेनालाई अलर्ट अवस्थामा राखिएको छ । जुन १८ को छलफल लगत्तै सीमा क्षेत्रमा भारतले सुरक्षा व्यवस्था कडा पारेको थियो ।

भारतले अरुणाञ्चल प्रदेश, उत्तराखण्ड, हिमाञ्चल र लद्दाख क्षेत्रमा वास्तविक सीमा रेखा एलएसीमा अतिरिक्त सुरक्षा व्यवस्था तैनाथ गरिसकेको छ । भारतीय वायु सेनाले पनि लद्दाख क्षेत्रमा सुरक्षा गस्ती सुरु गरेको छ । ३ हजार ५ सय किलोमिटर लामो चीन सीमामा भारतले सुरक्षाफौजलाई हाइअलर्टमा राखेको छ । हिन्द महासागरमा पनि भारतीय नौसेनाले गस्ती बढाएको छ ।