विश्व स्वास्थ्य संगठनको अपिल : महामारी कायमै छ, सतर्कता अपनाऔं

काठमाडौं । विश्व स्वास्थ्य संगठनको नेपालस्थित कार्यालयले कोभिड–१९ को महामारी कायमै रहेकाले पर्याप्त सतर्कता अपनाउन सार्वजनिक रुपमा अपिल गरेको छ ।

विश्व स्वास्थ्य संगठनका प्रमुख डा. जोस भ्यान्डेलरले नेपाल सरकारले लडकडाउन खुकुलो बनाए पनि कोभिड–१९ को महामारी टरिनसकेकाले आवश्यक सर्तकता अपनाउन सबैलाई अपिल गरेका हुन् ।

‘लकडाउन हामी सबैका लागि गाह्रो कुरा थियो । घर मै बस्नु पर्यो । साथीभाइलाई भेट्न पाइएन । काममा जान पाइएन । अहिले लकडाउन केही हदसम्म खुकुलो भएको छ र हामी वरपर जान पाएका छौं । काममा जान पाएका छौं । नातेदार परिवारहरुलाई भट्न जान पाइरहेका छौं,’ उनले भने, ‘तर हामीले याद गर्नुपर्ने कुरा के हो भने महामारी अझै पनि गईसकेको छैन । महामारी अझै पनि छ र हामी अझै पनि संक्रमित हुन सक्छौ तसर्थ हामी अलि होसियार हुनु जरुरी छ ।’

लकडाउन खुकुलो बनाएसँगै सर्वसाधरणको क्रियाकलाप बढ्दै गएको, कार्यालय सञ्चालन भएको तथा एकापसमा भेटघाटलगायत बढेको भन्दै डा. भ्यान्डेलरले त्यस क्रममा सबैले आ–आफ्नोतर्फबाट थप सतर्क हुनु जरुरी रहेको बताएका छन । उनले संक्रमण नियन्त्रणका लागि प्रत्येक व्यक्तिले आ–आफ्नोतर्फबाट जीवनशैली र कार्यशैलीमा परिर्वतन ल्याउनुपर्ने आवश्यकता औल्याएका छन् ।

मानिसहरुको भीडभाडमा नजाने, जानै परे दूरी कायम गर्ने, मास्क लगाउने तथा बेला बेलामा साबुन पानीले हात धुन पनि डा. भ्यान्डेलरले आग्रह गरेका छन । उनले ज्वरो, खोकी वा कुनै पनि किसिमको विसञ्चो भए तुरुन्तै स्वास्थ्यकर्मीलाई देखाउन आग्रह गरेका छन् ।