एसईईको उत्तरपुस्तिका हेर्न प्रति विषय दुई हजार तिर्नुपर्ने

काठमाडौ : राष्ट्रिय परीक्षा बोर्ड, परीक्षा नियन्त्रण कार्यालय कक्षा १० ले माध्यमिक शिक्षा परीक्षा एसईई– २०८० को पुनर्योगमा चित्त नबुझेमा उत्तरपुस्तिका हेर्न मिल्ने व्यवस्था गरेको छ । परीक्षार्थीले प्रति विषय दुई हजार तिरेर निवेदन दिएपछि उत्तरपुस्तिका हेर्न पाईने जनाएको हो ।

२०८० सालको माध्यमिक शिक्षा परीक्षा (एसईई) मा सम्मिलित भएका परीक्षार्थीहरू मध्ये पुनर्योग गराउन निवेदन दिएका परीक्षार्थीहरूले पुनर्योगका लागि निवेदन दिएका विषयका उपर चित्त नबुझेमा उत्तरपुस्तिका पुनः परीक्षण निर्देशिका, २०७५ बमोजिम उत्तरपुस्तिका हेर्न मिल्ने जनाएको छ ।

यसका लागि परीक्षार्थीले भदौँ २१ गतेभित्र प्रक्रिया पुरा गरेर परीक्षा नियन्त्रण कार्यालयमा निवेदन दिनुपर्ने छ । साथै पुनर्योगका लागि निवेदन दिएका विषयहरू मध्ये नतिजामा चित्त नबुझेका उत्तरपुस्तिका हेर्न चाहेका विषयहरूमा प्रति विषय दुई हजारका दरले राजस्व खातामा रकम जम्मा गर्नुपर्नेछ ।

उत्तरपुस्तिका हेर्न पाउँ भन्ने निवेदनको ढाँचामा उल्लेख गरिएका कागजातहरू सहित निवेदन दिएका परीक्षार्थीहरूले तोकिएको ढाँचामा कबुलियतनामा गरे पश्चात् उत्तरपुस्तिका पुनः परीक्षण निर्देशिका, २०७५ को दफा ३ (३) बमोजिम विषयगत विज्ञ र अभिभावक समेतको उपस्थितिमा उत्तरपुस्तिका हेर्ने व्यवस्था मिलाइने परीक्षा नियन्त्रण कार्यालयले सूचनामा उल्लेख गरेको छ ।

उत्तरपुस्तिका हेर्ने दिन र समय परीक्षार्थीले कबुलियतनामामा प्रदान गरेको सम्पर्क नम्बरमा जानकारी गराई उत्तरपुस्तिका हेर्न दिइने व्यवस्था गरेको छ ।खबर एजुकेशन