सीतापाईलामा दम्पत्ति हत्या गरी फरार आरोपी १४ बर्षपछी पक्राउ

काठमाण्डाैंः नेपाल प्रहरीको केन्द्रीय अनुसन्धान ब्यूरो (सीआईबी) ले काठमाडौंको सीतापाइलामा १४ वर्ष अघी भएको दम्पती हत्याका फरार आरोपीलाई  पक्राउ गरेको छ। सर्लाही घर भएका जेके भनिने ३४ बर्षीय जयकिशोर साहलाई सीआईबीले असार २८ गते आईतबार बाँकेबाट पक्राउ गरेको हो।

पक्राउ परेका साहलाई सोमबार ब्युरोले पत्रकार सम्मेलन गरि सार्वजनिक गरेको छ। २०६३ साल पुस २० गते सीतापाइलामा काठ मिल सञ्चालन गर्दै आएका ४५ वर्षीय नातिकाजी सुवेदी र उनकी श्रीमती सानु सुवेदीको हत्या गरी फरार भएका साहलाई बाँकेस्थित नेपाल-भारत सीमा क्षेत्रबाट पक्राउ गरिएको हो।

हत्यामा संलग्न अर्का आरोपी बाँकेका प्रताप राना भने अझै फरार रहेको प्रहरीको केन्द्रीय अनुसन्धान ब्युरोका प्रमुख डिआईजी सहकुल थापाले जनाकारी दिए । हत्या गरेपछि फरार रहेका दुवै जना भारतको लखनउ पुगेको र दुई वर्ष त्यहाँ सँगै बसेपछि राना अन्यत्रै लागेको उनको भनाई छ। साहले भारतमा पुगेर जय शर्मा नामबाट भारतीय रासन कार्डसमेत लिएर बस्दै आएको प्रमुख थापाले जानकारी दिए।

हत्याका आरोपी दुवै जना त्यही काठ मिलका कामदार हुन्। मिल सञ्चालक सुवेदीसँग भनाभन भएपछि २०६३ साल पुस २० गते राति छुरा प्रहार गरी सुवेदी दम्पतीको हत्या गरेका थिए। उक्त घटनाका बेला साह १५ बर्षका थिए। हत्या गरेपछि फरार रहेका दुवै जना भारतको लखनउ पुगेको प्रहरीले जनाएको छ। दुई वर्ष त्यहाँ सँगै बसेपछि राना अन्यत्रै लागेका थिए।