बलात्कारको आरोपमा सशस्त्र प्रहरीका एसएसपी पक्राउ

काठमाण्डौंः बलात्कारको आरोपमा सशस्त्र प्रहरी बलका वरिष्ठ प्रहरी उपरीक्षक (एसएसपी) राजेन्द्र अधिकारी पक्राउ परेका छन् । कास्कीको पोखरा स्थित हुलदंगा व्यवस्थापन तालिम शिक्षालयमा कार्यरत एसएसपी अधिकारीलाई पोखरा प्रहरीले बलात्कारको आरोपमा पक्राउ गरेको हो । उनीमाथि चितवनकी एक महिलाले बलात्कारको उजुरी दिएकी थिइन्।

अधिकारीमाथि ती महिलालाई तालिम केन्द्रमा बोलाएर बलात्कार गरेको आरोप लागेको छ। पीडित महिलाले एसएसपी अधिकारीले आफ्नो क्वार्टरमा खाना खान बोलाएर जबर्जस्ती करणी गरेको उजुरी प्रहरीलाई दिएकी थिइन्। ती महिला पोखरास्थित मामाघरमा बस्दै आएकी थिइन्।

घटनालगत्तै पीडित महिलाले बुधबार दिउँसो सवा २ बजे प्रहरीको कन्ट्रोल नम्बर १०० मा फोन गरेपछि तत्कालै घटनास्थलमा प्रहरी पुगेको थियो। उजुरी दिएको थाहा पाएपछि सम्पर्कविहीन भएका अधिकारीलाई उनकै कार्यालयको कम्पाण्डबाट नियन्त्रणमा लिएको पोखराका प्रहरी प्रमुख एसपी जीवन श्रेष्ठले जानकारी दिए। उनीमाथि थप अनुसन्धान भइरहेको श्रेष्ठको भनाइ छ।