सिद्धार्थ राजमार्गको पाल्पा-बुटवल सडकखण्ड फेरी अवरुद्ध

काठमाण्डाैंः सिद्धार्थ राजमार्गको पाल्पा बुटवल सडकखण्ड आज विहानैदेखि अवरुद्ध भएको छ । गएरातीदेखि परेको अविरल वर्षासँगै पहिरो खसेका कारण राजमार्ग अवरुद्ध भएको हो ।

सिदार्थ राजमार्गको डुम्रेस्थित गौडेपुल नजिकै वर्षासँगै निरन्तर ढुङ्गासहितको पहिरो खसेको तथा सोही राजमार्गको दोभान प्रहरीचौकी नजिकै पैठेडाँडामा लेदोसहितको पहिरोका कारण राजमार्ग पूर्णरुपमा बन्द भएको जिल्ला प्रहरी कार्यालय पाल्पाका सुचना अधिकारी मदन गिरीले जानकारी दिनुभयो ।

डुम्रेमा सडकदेखि करिब २ सय मिटर माथिबाट ढुङ्गा खस्ने क्रम नरोकिएको र पानी परीरहेका कारण पहिरो पन्छाउन समस्या भएको उहाँले बताउनुभयो । यस्तै दोभानमा पानी परिरहेको र पहिरो झर्ने क्रम नरोकिएका कारण पहिरो पन्छाउन समस्या भएको प्रहरीले जनाएको छ ।

केही दिन अघि पनि सोही ठाउँमा पहिरो खसेका कारण तीन दिनसम्म राजमार्ग अवरुद्ध भएको थियो । राजमार्ग अवरुद्ध भएसँगै सो राजमार्ग हुँदै यात्रा गर्ने पाल्पासहित गुल्मी, स्याङ्जा, पोखरा तथा तराईका जिल्लाहरु रुपन्देही, कपिलवस्तु, नवलपरासी हुँदै राजधानी हिंडेका यात्रुहरु बिच सडकमै अलपत्र परेका छन् ।