नेपाल पुलिस क्लब जय ट्रफी एलिट कप क्रिकेटको शीर्ष स्थानमा

काठमाडौं । मधेश प्रदेशलाई एक इनिङ्स ३५ रनले पराजित गर्दै विभागीय टिम नेपाल पुलिस क्लब जय ट्रफी एलिट कप क्रिकेटको शीर्ष स्थानमा उक्लिएको छ । आज भएको दोस्रो पालीको खेलमा मधेश प्रदेश ९४ रनमा अलआउट भयो ।

पहिलो पालीमा मधेश १२९ रनमा अलआउट भएको थियो । पुलिसले भने पहिलो पालीमा नै २५८ रनको बलियो योगफल खडा गरेको थियो । यो जितसँगै पुलिस अंक तालिकाको शीर्ष स्थानमा उक्लिएको छ । मधेशको फाइनल खेल्ने सम्भावना कठिन बन्दा पुलिसले फाइनल खेल्ने लगभग तय भएको छ ।

पुलिसको जितमा ओपनर कुशल भुर्तेलले अलराण्डर प्रदर्शन गरेका थिए । पहिलो पालीमा ६३ रन जोड्दै २ विकेट लिएका उनले आज ५ विकेट झारेका छन् । समग्रमा उनले ७ विकेट लिए । गुल्सन झाले आज २ विकेट लिँदा ललित राजवंशीले २ विकेट लिए ।

मधेशका कुनै पनि ब्याटरले राम्रो रन जोड्न सकेनन् । यसअघि एक शतक र एक अर्धशतक हिर्काएका ओपनर मयन यादव आज २२ रनमा आउट भए । विशाल पट्टेलले २७ रन थपे । यसअघि पहिलो पालीमा टस हारेर पहिले ब्याटिङ गरेको मधेश १२९ रनमा अलआउट भएको थियो । मधेशका लागि मयनले ५९ तथा निरज यादवले २९ रन जोडेका थिए ।

अघिल्लो खेलमा पुलिसले आर्मी र मधेशले बागमती प्रदेशसँग बराबरी खेलेका थिए। जितसँगै पुलिस अंक तालिकाको शीर्ष स्थानमा पुगेको छ। पुलिसले ४० अंक जोडेको छ भने दोस्रो स्थानको मधेशको २१ अंक छ। अघिल्लो खेलमा १५ अंक जोडेको पुलिसले दोस्रो खेलमा जित निकालेसँगै २५ अंक जोड्न सफल भयो। मधेसले भने दोस्रो खेलमा ६ अंक मात्र पायो।