स्ववियु निर्वाचन : घोडाघोडी क्याम्पसमा नेविसंघ र अनेरास्ववियुको प्यानल विजयी

घोडाघोडी (कैलाली) । कैलालीको घोडाघोडी बहुमुखी क्याम्पसमा स्वतन्त्र विद्यार्थी युनियनको निर्वाचनमा नेकपा (एमाले) निकट विद्यार्थी संगठन अनेरास्ववियुका अशोक गौतम विजयी भएका छन्।

अनेरास्ववियु र नेपाल विद्यार्थी संघको संयुक्त प्यानलका अध्यक्ष पदका साझा उम्मेदवार अशोक गौतमसहित प्यानल विजयी भएको हो।

उक्त क्याम्पसमा माओवादी केन्द्र निकट अखिल क्रान्तिकारीको विरासत भत्काउँदै अनेरास्ववियुको संयुक्त प्यानलले जित हासिल गरेको हो।

अनेरास्ववियुले घोडाघोडीमा स्ववियु निर्वाचनको इतिहासमै पहिलो जित दर्ता गरेको जनाइएको छ। कैलालीमा त्रिवि अन्तर्गतको यस वर्षको स्ववियु निर्वाचनमा अनेरास्ववियुको यो पहिलो जित हो।

गौतम छ सय ७० मतका साथ विजयी हुँदा उनका निकटतम प्रतिद्वन्द्वी अखिल (क्रान्तिकार)का गणेश भण्डारीले चार सय २८ मत प्राप्त गरे भने अर्का ‘विप्लव’ निकट अखिल समाजवादीबाट उम्मेदवार यामबहादुर खत्रीले १० मत प्राप्त गरे।

सचिवमा गौतम प्यानलकै नेविसंघका प्रविन सिंह विजयी भएका छन्। कोषाध्यक्षमा अनेरास्ववियुका सञ्जीवकुमार चौधरी विजयी भएका छन्।

त्यसैगरी, सदस्यमा गौतम पक्षको संयुक्त प्यानलबाट गोविन्द चौधरी, रमेश चौधरी, पद्यमा शाही, खिमा साउद, अनिता विक, सुवास चौधरी विजयी भएका छन् ।

घोडाघोडी बहुमुखी क्याम्पसमा १६ सय ९१ मतदाता रहेकोमा शनिबार मतदान कार्यक्रममा ११ सय २६ जनाले मतदान गरेका थिए। जसमा ११ सय १२ मत सदर हुँदा १२ मत बदर भएको घोडाघोडी बहुमुखी क्याम्पसका स्ववियु निर्वाचन संयोजक विनोदकुमार खड्काले जानकारी दिए।

समानुपातिक तर्फसमेत अनेरास्ववियु ४२४ मत प्राप्त गरी पहिलो हुन सफल भएको छ। त्यसैगरी ३८९ मत प्राप्त गरी अखिल क्रान्तिकारी दोस्रो र २५४ मत प्राप्त गरी नेविसंघ तेस्रो विद्यार्थी संगठनको रूपमा रहेको जनाइएको छ। अन्तिम मत परिणाम आइतबार सार्वजनिक भएको हो।

यस अघि चैत ५ गते अन्तिम मतदाता नामावलीमा विवाद भएपछि स्थगित भएको निर्वाचन शनिबार सम्पन्न भएको थियो।

नेपाली काँग्रेस निकट विद्यार्थी संगठन नेपाल विद्यार्थी संघ र एमाले निकट विद्यार्थी संगठन अनेरास्ववियुबिच चुनावी तालमेल हुँदा नेकपा (माओवादी) निकट अखिल क्रान्तिकारी र एकीकृत समाजवादी निकट अनेरास्ववियु चुनावी तालमेल प्रतिस्पर्धा रहेका थिए।