अनलाइन पत्रिका दर्ता तथा नविकरण अनिश्चितकालका लागि स्थगित

काठमाडौं, २० साउन । अनलाइन पत्रिकाको दर्ता तथा नविकरण प्रक्रिया अनिश्चितकालका लागि रोकिएको छ।

१४ साउनमा नेपाल राजपत्रमा स्थानीय अधिकारीको कार्यालयमार्फत दर्ता हुने सूचना प्रकाशित भएपछि मंगलबारदेखि सूचना तथा प्रसारण विभागले यो प्रक्रिया स्थगित गरेको हो।

हालसम्म अनलाइन पत्रिका दर्ता तथा नविकरण सूचना तथा प्रसारण विभागमार्फत हुँदै आएको थियो। तर नयाँ सूचना कार्यान्वयन भएपछि विभागले प्रक्रिया रोकेको र जिल्ला प्रशासन कार्यालयमा समेत यो कार्य सुरु नभएको जनाएको छ।

नविकरणको समयमै यस्तो सूचना आएकोले चालु आर्थिक वर्षका लागि नविकरण गर्न बाँकी अनलाइन सञ्चालकहरू अन्योलमा परेका छन्।