नेपालमा डेंगु संक्रमणदर ह्वात्तै बढ्यो

काठमाण्डौं, १० असोज । नेपालमा डेंगु संक्रमणदर ह्वात्तै बढेको छ । इपिडिमियोलोजी तथा रोग नियन्त्रण विभाग (इडिसिडी)का अनुसार ९ असोजसम्म पाँच हजार २३ जनामा संक्रमण पुष्टि भएको हो ।

यस्तै, हालसम्म डेंगु संक्रमणबाट यस वर्ष दुईजनाको मृत्यु भइसकेको छ । पछिल्लो २४ घण्टामा ४० जनामा संक्रमण पुष्टि भएको छ भने एक सातायता २८१ जनामा डेंगु पुष्टि भएको इडिसिडीको तथ्यांक छ ।

७५ जिल्लामा फैलिएको डेंगु संक्रमण भदौ र असोजमा बढी फैलने डर हुने भएकाले यी दुई महिनामा डेंगु सार्ने लामखुट्टेबाट बढी सजग हुन चिकित्कले अनुरोध गरेका छन् । स्वास्थ्य मन्त्रालयका प्रवक्ता डा. प्रकाश बुढाथोकीले डेंगु संक्रमणदर पछिल्लो दुई महिनामा बढे पनि जाडोयाम सुरु भएसँगै क्रमशः घट्दै जाने बताए ।

डेंगु सार्ने प्रजातिकै लामखुट्टेको टोकाइबाट हुने जापनिज इन्सेफलाइटिस (जेइ)बाट मृत्यु हुनेको संख्या पनि २९ पुगेको छ । यो गत वैशाखयताको तथ्यांक हो । स्वास्थ्य मन्त्रालय परिवार कल्याण महाशाखाका अनुसार हालसम्म १५१ जिल्लामा जापनिज इन्सेफलाइटिस पुष्टि भएको छ भने २९ जना अर्थात् १९ प्रतिशतको मृत्यु भएको हो ।

परिवार कल्याण महाशाखाका डा. अभियान गौतमका अनुसार हालसम्म जापनिज इन्सेफलाइटिस संक्रमण ४१ जिल्लाका १०४ स्थानीय तहमा देखिएको छ ।