मणिपाल शिक्षण अस्पतालमा नर्सहरूको आन्दोलन स्थगित

काठमाण्डौ, २१ असोज । श्रम शोषण र न्यूनतम पारिश्रमिक नपाएको आरोप लगाउँदै पोखरा महानगरपालिका–११ फुलबारीस्थित मणिपाल शिक्षण अस्पतालका नर्सहरू आन्दोलित भएका छन्।

सरकारले निर्धारण गरेको १९ हजार ३०० रुपैयाँ न्यूनतम पारिश्रमिक नपाएको, कार्य समय सात घण्टाबाट आठ घण्टामा बढाइएको, साथै चाडपर्व, घर र बिरामी बिदा कटौती गरिएको भन्दै उनीहरू शनिबार साँझदेखि आन्दोलनमा उत्रिएका हुन्।

नर्सहरूले अस्पताल परिसरमै प्लेकार्डसहित धर्ना, नारा र प्रदर्शन गरेका थिए। उनीहरूले “हामीलाई न्याय दे!”, “श्रम शोषण बन्द गर!”, “हामी मेसिन होइनौं, नर्स हौं!” जस्ता नारा लगाएका थिए।

उनका अनुसार, अस्पतालले १६ हजार मात्र तलब दिँदै आएको र पटक–पटक माग राख्दा पनि प्रशासनले बेवास्ता गरेपछि बाध्य भएर आन्दोलन गर्नुपरेको हो। हाल अस्पतालमा करिब तीन सय नर्सहरू कार्यरत छन्।

तर, अस्पतालका निर्देशक डा. अभिषेक मास्केले वार्तापछि तत्कालका लागि आन्दोलन स्थगित भएको बताएका छन्। उनका अनुसार, अस्पताल प्रशासन र आन्दोलनरत नर्सबीच भएको सहमतिअनुसार एक साताभित्र योग्यता र अनुभवका आधारमा तलब वृद्धि गर्ने निर्णय भएको छ।

डा. मास्केले भने, “एक साताभित्र तलब संरचना परिमार्जन गर्ने सहमति भएको छ। सहमति अनुसार कार्यान्वयन नभए नर्सहरूले पुनः आन्दोलन गर्ने चेतावनी दिएका छन्।”

यससँगै मणिपाल शिक्षण अस्पतालमा केही दिनदेखिको नर्सहरूको आन्दोलन हाल स्थगित भएको छ।