महिला इन्टर हब टी–२० क्रिकेटको उपाधि मोरङलाई, सिरहामाथि सात विकेटको जित

भारदह(सप्तरी), कात्तिक २७ गते । सप्तरी क्रिकेट सङ्घको समन्वय तथा सबल नेपालद्वारा राजबिराजमा आयोजित जिल्लास्तरिय महिला इन्टर हब टी–२० क्रिकेट प्रतियोगिताको उपाधि मोरङले जितेको छ ।

राजबिराज स्थित पविमाबि खेल मैदानमा बिहीबार भएको फाइनलमा मोरङले सिरहालाई सात विकेटले हरायो । टस जितेर पहिले ब्याटिङ गरेको सिरहाले १४.४ ओभरमा सबै विकेटको क्षतिमा ४६ रन बनाएको थियो ।

सिरहाका लागि अनुराधा चौधरी २६ रन बनाउनुभयो । अन्य खेलाडीले दोहोरो अङ्कमा रन बनाउन सकेनन् । बलिङमा मोरङका श्रृजना राजबंशीले तीन विकेट लिनुभयो ।

निरू राजबंशी दुई तथा बिकेट सुबेक्क्षा लिम्बू, बन्दना राजबंशी र पुर्णिमा राजबंशीले एक एक विकेट लिनुभयो । ४८ रनको लक्ष्य पछ्याएको मोरङले आठ ओभरमा तीन विकेटको क्षतिमा लक्ष्य पूरा गरेको थियो ।

मोरङका लागि प्रिन्सा रानामगरले नटआउट १५, खुशी राजबंशीले ११ रन टिका साहले १० रन बनाउनुभयो । बलिङमा सिरहाका सरस्वती चौधरीले दुई तथा मिना महतोले एक विकेट लिनुभयो । मोरङकी  श्रृजना राजबंशी प्लेयर अफ दि म्याच बन्नुभयो ।