‘अभिमन्यु च्याप्टर–१’ को नयाँ गीत ‘मरौ ज्यानले’ सार्वजनिक

काठमाडौँ । मंसिर १८ गते रिलिज हुने नेपाली चलचित्र ‘अभिमन्यु च्याप्टर–१’ ले आफ्नो नयाँ गीत ‘मरौ ज्यानले’ सार्वजनिक गरेको छ। दर्शक–श्रोताबाट सकारात्मक प्रतिक्रिया पाइरहेको यो गीतमा सुशान्त गौतमको स्वर र संगीत रहेको छ भने सुरेश बादलले गीतका शब्द लेखेका छन्।

गीत प्रेम–वियोगमा छटपटिरहेको प्रेमीको मानसिक द्वन्द्व, बाँच्न–मर्न दुवै असमर्थ अवस्थाको भावनात्मक कथा लिएर आएको छ। प्रेमिकाको मीठो सम्झना, साथ रहने वाचा बीचमै भंग हुँदा उत्पन्न पीडा, र अव्यक्त प्रेमको वेदना गीतमा मार्मिक रूपमा प्रस्तुत गरिएको छ।

गीतको भिडियोमा चलचित्रका मुख्य कलाकार कामेश्वर चौरसिया र लक्ष्मी बर्देवालाई प्रस्तुत गरिएको छ। भिडियोमा चलचित्रका फुटेज समावेश गरिएका छन्, जसले तराई–मधेशका दृश्यहरू आकर्षक ढंगले देखाउँछ।

चलचित्रमा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल र शिशिर वाङ्देलका प्रमुख भूमिका रहेका छन्। सुशान्त गौतम निर्देशित उक्त चलचित्रका निर्माता विनोद पौडेल र गुञ्जन गिरी हुन्। रमेश चौलागाईं र हरि श्रेष्ठ सह–निर्माता हुन् भने कार्यकारी निर्माता विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन्।