निर्वाचनमार्फत नयाँ सरकारलाई शक्ति हस्तान्तरण गर्न आतुर छु : प्रधानमन्त्री कार्की

काठमाडौं । प्रधानमन्त्री सुशीला कार्कीले निर्वाचनमार्फत अभिव्यक्त हुने नयाँ जनभावनाअनुसारको सरकारलाई सत्ता हस्तान्तरण गर्न सरकार पूर्ण रूपमा तयार र आतुर रहेको बताएकी छन् । ललितपुर महानगरपालिकाको १०७औँ स्थापना दिवसको अवसरमा आयोजित विशेष कार्यक्रममा सम्बोधन गर्दै प्रधानमन्त्री कार्कीले मुलुकलाई सुरक्षित, लोकतान्त्रिक र संविधानसम्मत बाटोमा अघि बढाउने एकमात्र उपाय निर्वाचन नै भएको स्पष्ट पारिन् ।

प्रधानमन्त्री कार्कीले गत भदौ २३ र २४ गते सम्पन्न जेन–जी युवाहरूको आन्दोलनपछि देशमा नयाँ राजनीतिक परिस्थिति सिर्जना भएको उल्लेख गर्दै वर्तमान सरकार सुशासन र निर्वाचनलाई दुई मुख्य एजेन्डाका रूपमा लिएर अघि बढिरहेको बताइन् । उनले आउँदो फागुन २१ गते तोकिएको प्रतिनिधिसभा निर्वाचन सम्पन्न गर्ने स्पष्ट लक्ष्यसहित सरकार अहोरात्र खटेर तयारीका काम तीव्र रूपमा अघि बढाइरहेको जानकारी दिइन् ।

“निर्वाचनमार्फत जनताले व्यक्त गर्ने नयाँ जनभावनाअनुरूपको सरकारलाई शक्ति हस्तान्तरण गर्न हामी आतुर छौँ,” प्रधानमन्त्री कार्कीले भनिन्, “त्यसैले यो निर्वाचन कम खर्चिलो, स्वच्छ, निष्पक्ष र भयरहित वातावरणमा सम्पन्न गर्न सबैको सक्रिय सहयोग आवश्यक छ ।”

उनले मुलुकलाई संविधानसम्मत, लोकतान्त्रिक विधि र सुशासनको मार्गमा सुरक्षित रूपमा अघि बढाउन निर्वाचन बाहेक अन्य विकल्प नरहेको दोहोर्‍याइन् । समाजमा अराजकता र अव्यवस्थाले स्थान पाउन नहुने स्पष्ट पार्दै प्रधानमन्त्री कार्कीले शान्ति खल्बल्याउने, कानून हातमा लिने तथा आपराधिक गतिविधिमा संलग्न हुने तत्वहरूलाई नियन्त्रण गर्न सुरक्षा प्रशासन सक्षम र सक्रिय रहेको पनि बताइन् ।

प्रधानमन्त्री कार्कीले अराजक तत्वविरुद्ध राज्य संयन्त्र मात्र होइन, समुदायको भूमिका पनि महत्वपूर्ण हुने उल्लेख गर्दै सबैलाई हातेमालो गर्न आह्वान गरिन् । “खराब तत्वको प्रतिरोध गर्न समुदायको पनि उत्तिकै भूमिका हुन्छ,” उनले भनिन्, “शान्ति, स्थिरता र लोकतन्त्रको संरक्षणका लागि हामी सबै एकजुट हुन आवश्यक छ ।”

कार्यक्रममा प्रधानमन्त्री कार्कीले ललितपुर महानगरपालिकाको ऐतिहासिक योगदानको प्रशंसा गर्दै स्थानीय तहको सशक्तिकरण लोकतन्त्रको बलियो आधार भएको उल्लेख गरिन् । सरकार आगामी निर्वाचन सफलतापूर्वक सम्पन्न गरेर जनताको निर्णयअनुसार सत्ता हस्तान्तरण गर्न प्रतिबद्ध रहेको सन्देश उनले सो अवसरमा दोहोर्‍याइन् ।