काँग्रेस संस्थापनाको पत्रकार सम्मेलन स्थगित

काठमाण्डौं । नेपाली कांग्रेसले आज आयोजना गर्न लागेको पत्रकार सम्मेलन स्थगित गरेको छ । कार्यवाहक सभापति पूर्णबहादुर खड्काले नेता शेखर कोइरालासहित केन्द्रीय नेताहरूलाई सहभागी गराएर दिउँसो १ बजे पार्टी केन्द्रीय कार्यालय सानेपामा गर्न लागेको पत्रकार सम्मेलन अन्तिम समयमा स्थगित गरिएको हो ।

पार्टीका मुख्यसचिव कृष्णप्रसाद पौडेलले मध्याह्न पौने १२ बजे विज्ञप्ति जारी गर्दै पत्रकार सम्मेलन स्थगित गरिएको जानकारी दिएका छन् । सम्मेलन किन स्थगित गरियो भन्नेबारे विज्ञप्तिमा विस्तृत कारण खुलाइएको छैन ।

पार्टीभित्र विशेष महाधिवेशनलाई लिएर विवाद बढिरहेका बेला पत्रकार सम्मेलन स्थगित भएको हो । सभापति र कार्यवाहक सभापतिसहित अधिकांश संस्थापन पक्षको विरोधका बाबजुद महामन्त्रीद्वय गगन थापा र विश्वप्रकाश शर्माले पुस २७ र २८ गते विशेष महाधिवेशन आह्वान गरिसकेका छन् ।

संस्थापन पक्षले विशेष महाधिवेशन पक्षधरहरूलाई हस्ताक्षर फिर्ता लिन हिजो आग्रह गरेको थियो । तर महामन्त्री गगन थापाले उक्त आग्रहको विरोध गर्दै विशेष महाधिवेशन पार्टी विधानअनुसारको प्रक्रिया भएको दाबी गरेका थिए । विशेष महाधिवेशनलाई लिएर कांग्रेसभित्रको आन्तरिक मतभेद थप सतहमा आएको देखिएको छ ।