काठमाण्डौं । गाब्रिएल जेससले दुई गोल गर्दै आर्सनललाई इन्टर मिलानमाथि ३–१ को जित दिलाएका छन्। यो जितसँगै आर्सनल च्याम्पियन्स लिगको अन्तिम १६ मा प्रवेश गर्न सफल भएको छ। खेलपछि जेससले यस जितलाई आफ्नो करिअरको भावुक क्षणका रूपमा वर्णन गर्दै आँखामा आँसु आएको बताए।
२८ वर्षीय ब्राजिलियन फरवार्ड जेसस घुँडाको एसीएल चोटका कारण ११ महिना मैदान बाहिर रहेपछि हालै मात्र टोलीमा फर्किएका थिए। चोटपछिको कमब्याकपछि इन्टरविरुद्धको खेल उनको तेस्रो सुरुवाती खेल थियो, जहाँ उनले पुरानै लयमा फर्किएको संकेत दिए।
खेलपछि अमेजन प्राइमसँग कुरा गर्दै जेससले मिलानको मैदानमा गोल गर्न पाउनु आफ्ना लागि सपनाजस्तै भएको बताए। कठिन समयले आफूलाई जीवन र फुटबल दुवैमा धेरै कुरा सिकाएको उनको भनाइ थियो।
आर्सनलका प्रशिक्षक मिकेल आर्टेटाले जेससको प्रशंसा गर्दै उनको पुनरागमनले टोलीको आत्मविश्वास बढेको बताए। यस खेलमा जेसस र ग्योकेरेस दुवैले गोल गरेपछि फरवार्ड पोजिसनमा प्रतिस्पर्धा थप सकारात्मक बनेको पनि प्रशिक्षकको धारणा छ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया