विदेशी सम्बन्धन कलेजले ठगी गरेको आरोपसहित अखिल (क्रान्तिकारी)द्वारा मन्त्रालयमा ज्ञापनपत्र

काठमाडौं । नेकपा (बहुमत) निकट विद्यार्थी संगठन अखिल (क्रान्तिकारी) ले नेपालमा सञ्चालन भइरहेका विदेशी सम्बन्धनप्राप्त कलेजहरूले शिक्षाको नाममा संगठित ठगी र शोषण गरिरहेको आरोप लगाउँदै शिक्षा, विज्ञान तथा प्रविधि मन्त्रालयमा ज्ञापनपत्र बुझाएको छ।

संगठनले २०५९ सालमा जारी विदेशी शिक्षण संस्थासम्बन्धी निर्देशिका अवैधानिक भएको दाबी गर्दै त्यसकै आडमा विद्यार्थी ठगी, भ्रमपूर्ण सम्बन्धन, छात्रवृत्ति नदिने, धम्की दिने र विदेश पठाएर श्रम शोषणसम्म भइरहेको जनाएको छ।

शिक्षा सचिव चूडामणि पौडेललाई बुझाइएको ज्ञापनपत्रमा तथाकथित विदेशी सम्बन्धनका नाममा सञ्चालित द ब्रिटिस कलेजको अनुमति खारेज गरी कारबाही गर्न माग गरिएको छ। साथै, विदेशी सम्बन्धन कलेजमाथि छानबिन गर्न उच्चस्तरीय समिति गठन, नयाँ भर्ना रोक, मापदण्ड नपुगेका कलेज बन्द तथा विद्यार्थीको भविष्य सुरक्षित गर्न आग्रह गरिएको छ।