टी–२० विश्वकपमा जिम्बाब्वेको सानदार प्रदर्शन, अष्ट्रेलिया स्तब्ध

काठमाडौँ । टी–२० विश्वकप अन्तर्गत समूह चरणको खेलमा जिम्बाब्वेले अष्ट्रेलियालाई २३ रनले हराएको छ । टी–२० विश्वकपमा जिम्बाब्वेले अष्ट्रेलियालाई दोस्रो पटक स्तब्ध पारेको हो । टोलीले यसअघि २००७ मा लिग चरण खेलमा अष्ट्रेलियालाई हराएको थियो ।

जिम्बाब्वेले दिएको १७० रनको लक्ष्य पछ्याएको अष्ट्रेलिया १९.३ ओभरमा १४६ रन बनाउदै अलआउट भयो । अष्ट्रेलियाको लागि म्याट रेन्शले सर्वाधिक ६५ रन बनाए । ग्लेन म्याक्सवेलले ३१ रन जोड्दा मार्कस स्टोइनिसले ६, ट्राभिस हेडले १७, र जोश इन्ग्लिसले जम्मा ८ रन जोडे ।

जिम्बाब्वेका लागि ब्लेसिङ मुजराबानीले ४ विकेट लिए भने ब्राड इभान्सले तीन तथा वेलिङटन मसाकदजा र रायन बुर्लले एक–एक विकेट लिए ।

त्यसअघि कोलम्बोको आर प्रेमादासा रंगशालामा टस हारेर ब्याटिङ गरेको जिम्बाब्वेले २० ओभरमा २ विकेटको क्षतिमा १६९ रन बनाएको थियो । उसका लागि ब्रायन बेनेटले ५६ बलमा अविजित ६४ रन बनाए । यो टी–२० विश्वकपमा उनको पहिलो अर्धशतक थियो र टी–२० अन्तर्राष्ट्रियमा उनको ११ औं अर्धशतक थियो।यस्तै, तडिवानासे मारुमनी र रायन बुर्लले ३५–३५ रन जोडे । सिकन्दर रजाले अविजित २५ रनको योगदान दिए ।

बलिङतर्फ अष्ट्रेलियाका मार्कुस स्टोइनिस र क्यामरुन ग्रिनले एक–एक विकेट लिए ।

यसअघिको खेलमा अष्ट्रेलियाले आयरल्यान्डलाई ६७ रनले हराएको थियो भने जिम्बाब्वेले ओमानमाथि ८ विकेटले पराजित गरेको थियो ।