एन्फाको आर्थिक अनियमितता छानबिन गर्न राखेपले बनायो छानबिन समिति

काठमाडौं । राष्ट्रिय खेलकुद परिषद्ले अखिल नेपाल फुटबल संघ (एन्फा) को आर्थिक अनियमितताको बारेमा छानबिन गर्न तीन सदस्यीय छानबिन समिति गठन गरेको छ ।

राखेप सदस्य कमल भट्टराई संयोजक रहेको छानबिन समितिको सदस्यमा राखेपका लेखा अधिकृत टंकनाथ कँडेल र आपूर्ति तथा भण्डार शाखाका गोपीकृष्ण निरौला छन् ।

एन्फाले पारदर्शी ढंगबाट खरिद प्रक्रिया नगरेको भन्ने विषयमा अख्तियार दुरुपयोग अनुसन्धान आयोगमा उजुरी परेपछि सो विषयमा राखेपसँग राय मागेपछि राखेपले कार्यकारी समितिको बैठक बोलाई उक्त समिति गठन गरेको हो ।

उक्त समितिले एक हप्ताभित्र छानबिन गरी अख्तियारलाई पठाउने जवाफको बारेमा राय तयार पार्नेछ । एन्फा अहिले राखेपको तीन महिनाको निलम्बनमा छ ।

साथै मंगलबार बसेको बैठकले निलम्बित एन्फाका पदाधिकारीहरूलाई फुटबलको अन्तर्राष्ट्रिय कार्यक्रमहरूका लागि विदेश भ्रमण गर्न पनि रोक लगाउने र यस विषयमा गृह मन्त्रालयलाई पत्राचार गर्ने निर्णय गरेको छ ।