आइसिसी क्रिकेट विश्वकप लिग २ : शनिबार अमेरिकाको सामना गर्दै नेपाल

काठमाडौँ । आइसिसी क्रिकेट विश्वकप लिग २ अन्तर्गत नेपालमा भइरहेको नेपाल, अमेरिका र स्कटल्यान्डबिचको शृङ्खलामा नेपालले शनिबार अमेरिकाको सामना गर्दै छ । शृङ्खलामा दुई खेल सम्पन्न भएका छन् । दुवै खेलमा समान किसिमको नतिजा पनि आएको छ ।

दुवै खेलमा विजयी टिम थियो स्कटल्यान्ड, पराजित टिम थिए नेपाल र अमेरिका अनि जितको अन्तर थियो केवल २ रन । नेपाललाई पनि डीएल पद्धतिमा २ रनले हराएको स्कटल्यान्डले बिहीबार अमेरिकासँग पनि त्यही भाग्य दोहोर्‍यायो ।

लिग २ मा रोमाञ्चक नतिजाहरू निस्किरहँदा नेपाली टोली भने दबाबमा छ, शनिबार हुने अमेरिकासँगको खेलमा जित निकाल्दै नेपाल लयमा फर्किन चाहन्छ । त्यसको लागि कमजोरीमा सुधार भने अवश्य गर्नुपर्ने हुन्छ ।

लिग २ अङ्कतालिकामा अमेरिका २५ खेलबाट ३६ अंक जोडेर दोस्रो स्थानमा छ । शृङ्खला सुरु हुनुअगाडि शीर्षमा भए पनि स्कटल्यान्डले लगातार दुई जित निकालेपछि अमेरिका शीर्षबाट दोस्रोमा झरेको हो ।

स्कटल्यान्ड ३० खेलमा ३८ अंक जोडेर शीर्षस्थानमा छ । नेपाल भने २५ खेलमा १८ अङ्कका साथ सातौं स्थानमा छ । नेपाल र अमेरिका हालसम्म ओडिआई फर्म्याटमा ११ पटक आमनेसामने भएका छन् । नेपालले ४ खेल जित्दा ६ खेलमा पराजित भएको छ । एक खेल टाई भएको थियो ।