परराष्ट्रमन्त्री खनाल र सुरक्षा सल्लाहकार डोभालबिच भेटवार्ता

काठमाण्डौं । भारतको औपचारिक भ्रमणमा रहेका परराष्ट्रमन्त्री शिशिर खनालले भारतीय राष्ट्रिय सुरक्षा सल्लाहकार अजित डोभालसँग भेटवार्ता गरेका छन्। नयाँदिल्ली पुगेको केही समयमै भएको उक्त भेटलाई नेपाल–भारत सम्बन्धका दृष्टिले महत्वपूर्ण मानिएको छ।

भेटका क्रममा नेपाल र भारतबीचको सुरक्षा सहकार्य, सीमा व्यवस्थापन, सूचना आदानप्रदान तथा क्षेत्रीय सुरक्षासम्बन्धी विषयमा छलफल भएको जनाइएको छ। दुवै पक्षले दुई देशबीच विद्यमान मैत्रीपूर्ण सम्बन्धलाई अझ सुदृढ बनाउँदै सुरक्षा सहयोगलाई प्रभावकारी बनाउने विषयमा विचार आदानप्रदान गरेका थिए।

परराष्ट्रमन्त्री शिशिर खनालको भारत भ्रमणका क्रममा भारतीय उच्च अधिकारीहरूसँग द्विपक्षीय हित, आर्थिक सहकार्य, कूटनीतिक सम्बन्ध तथा पारस्परिक चासोका विविध विषयमा भेटघाट हुने कार्यक्रम रहेको बताइएको छ। भ्रमणलाई नेपाल–भारत सम्बन्धमा पछिल्ला समयका विषयहरूबारे संवाद विस्तार गर्ने अवसरका रूपमा हेरिएको छ।

मन्त्री खनाल तीनदिने भारत भ्रमणका लागि नयाँदिल्ली पुगेका हुन्। भ्रमणका क्रममा विभिन्न उच्चस्तरीय भेटवार्ता सम्पन्न गर्ने तालिका रहेको छ भने उनी जेठ २४ गते स्वदेश फर्किने कार्यक्रम रहेको परराष्ट्र मन्त्रालयले जनाएको छ।