उद्योगमन्त्री साह र भारतीय राजदूत दलेलाबीच भेट

काठमाडौँ । उद्योग, वाणिज्य तथा आपूर्तिमन्त्री दीपककुमार साह र नेपालका लागि भारतीय राजदूत सुधाकर दलेलाबीच शिष्टाचार भेटवार्ता भएको छ।

सिंहदरबारस्थित उद्योग, वाणिज्य तथा आपूर्ति मन्त्रालयमा सोमबार भएको भेटमा नेपाल र भारतबीचको द्विपक्षीय व्यापार तथा आर्थिक सम्बन्धलाई थप सुदृढ र विस्तार गर्ने विषयमा विचार आदानप्रदान भएको मन्त्री साहको सचिवालयले जनाएको छ।

भेटका क्रममा दुई देशबीच रहँदै आएको आर्थिक तथा व्यापारिक सहकार्यलाई थप प्रभावकारी बनाउने र आपसी सम्बन्धलाई नयाँ उचाइमा पुर्‍याउने विषयमा छलफल भएको जनाइएको छ।

नेपालको वैदेशिक व्यापारमा भारत महत्वपूर्ण साझेदार रहँदै आएको छ। भारत नेपालको सबैभन्दा ठूलो व्यापारिक साझेदार तथा वैदेशिक लगानीको प्रमुख स्रोत हो। नेपाल र भारतबीचको कुल वस्तु व्यापारको करिब दुईतिहाइ हिस्सा भारतसँग हुने भारतीय दूतावासको विवरणमा उल्लेख छ।

नेपाल–भारतबीच व्यापार, पारवहन, लगानी, ऊर्जा तथा पूर्वाधार विकासलगायतका क्षेत्रमा सहकार्य हुँदै आएको छ। दुई देशबीच व्यापार तथा पारवहनसम्बन्धी विभिन्न द्विपक्षीय संयन्त्रसमेत क्रियाशील छन्।

मन्त्री साह र राजदूत दलेलाबीच भएको भेटलाई दुई देशबीचको आर्थिक तथा व्यापारिक सम्बन्ध विस्तारका विषयमा छलफल गर्ने अवसरका रूपमा हेरिएको छ।