विदेशबाट देउवाको चेतावनी : सरकार अलोकतान्त्रिक बाटोमा जान सक्छ

काठमाडौं : नेपाली कांग्रेसका पूर्वसभापति शेरबहादुर देउवाले आफू छिट्टै स्वदेश फर्कन लागेको जानकारी दिँदै वर्तमान सरकार प्रतिशोधात्मक र अलोकतान्त्रिक बन्न सक्ने आशंका व्यक्त गरेका छन् ।

केही महिनादेखि स्वास्थ्य उपचारका सिलसिलामा परिवारसहित विदेशमा रहेका देउवाले एक सन्देश जारी गर्दै नेपालको पछिल्लो राजनीतिक घटनाक्रमलाई आफूले नजिकबाट नियालिरहेको बताएका छन् ।

देउवाले सरकारले प्रतिपक्षप्रति प्रतिशोधको राजनीति अघि बढाउँदै स्वतन्त्र न्यायपालिका र संवैधानिक संस्थाहरूमाथि दबाब सिर्जना गरेको आरोप लगाएका छन् ।

विशेषगरी न्यायपालिका र अख्तियार दुरुपयोग अनुसन्धान आयोगलाई कार्यकारी नियन्त्रणमा राखी प्रतिपक्षलाई आतंकित पार्ने औजार बनाउन खोजिएको उनको दाबी छ ।

राज्यशक्तिको दुरुपयोग, राजनीतिक पूर्वाग्रहका आधारमा हुने दमन र मनोवैज्ञानिक त्रास सिर्जना गरेर प्रतिपक्षलाई दबाउने प्रवृत्ति कुनै पनि लोकतान्त्रिक समाजका लागि स्वीकार्य नहुने उनले स्पष्ट पारेका छन् ।

आफ्नो सन्देशमा देउवाले भनेका छन्, ‘…यही विश्वासका साथ म नेपाली भूमिमा पुनः पाइला टेक्दै छु । सरकार प्रतिशोधात्मक र अलोकतान्त्रिक बन्न सक्छ, तर म नेपाली जनताको लोकतान्त्रिक चेतना, राष्ट्रप्रेम र न्यायप्रतिको विश्वासमा पूर्ण आस्था र समर्पण भाव राख्दछु ।’

विगत ६ दशकभन्दा लामो राजनीतिक यात्रामा अनेकौं निरंकुशता र लोकतन्त्रविरोधी शक्तिविरुद्ध संघर्ष गरेको स्मरण गर्दै उनले अहिले देशलाई विभाजन र प्रतिशोध नभई एकता र सहकार्य चाहिएको उल्लेख गरेका छन् ।

जननायक बिपी कोइरालाको राष्ट्रिय मेलमिलापको नीति अहिले झन् सान्दर्भिक भएको बताउँदै देउवाले प्रतिशोध र निषेधको राजनीतिबाट माथि उठेर राष्ट्र निर्माणमा लाग्न सबै राजनीतिक शक्ति, नागरिक समाज र युवा पुस्तालाई हार्दिक आग्रह समेत गरेका छन् ।