बैंकिङ कसुर मुद्दाका फरार प्रतिवादी पक्राउ

काठमाडौँ, १८ साउनः प्रहरीले बैंकिङ कसुर मुद्दामा फरार रहेका एक प्रतिवादीलाई काठमाडौँको कागेश्वरी मनोहरा नगरपालिका–७ बाट पक्राउ गरेको छ ।

प्रहरीको केन्द्रीय समाचार कक्षका अनुसार धादिङ ज्वालामुखी गाउँपालिका–३ का  अन्जन भट्टलाई पक्राउ गरिएको हो ।

चितवन जिल्ला अदालतबाट पक्राउ पुर्जी जारी भई फरार रहेका उनलाई काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले कागेश्वरी मनोहराबाट नियन्त्रणमा लिएको हो । उनलाई आवश्यक अनुसन्धान तथा कारबाहीका लागि जिल्ला प्रहरी कार्यालय चितवन पठाइएको छ ।

यस्तै, जगरनाथपुर गाउँपालिका–२ बाट स्रोत नखुलेको दुई लाख नौ हजार ५०० भारतीय रूपैयाँसहित दुई जनालाई पक्राउ गरेको छ । पक्राउ पर्नेहरूमा मकवानपुर राक्सिराङका दिपेश हिमडुङ र तिलक हिमडुङ रहेका छन् ।

इलाका प्रहरी कार्यालय जानकी टोलबाट खटिएको प्रहरीले मोटरसाइकलमा सवार भइरहेको बेला उनीहरूलाई उक्त नगदसहित फेला पारी पक्राउ गरेको हो । सो सम्बन्धमा प्रहरीले आवश्यक अनुसन्धान गरिरहेको छ ।