भाद्र २३, २०८३ मंगलबार
September 8, 2026
युग खबर
२०८३ भाद्र २३, मंगलबार
काठमाण्डौं, भदौ २३ गते । अविरल वर्षापछि पहिरो खस्दा सोमबार रातिदेखि अवरुद्ध भएको राप्ती लोकमार्गअन्तर्गत सल्यान–दाङ सडकखण्ड करिब १३ घण्टापछि सञ्चालनमा आएको छ । विभिन्न स्थानमा भएको अवरोधमध्ये मुख्य दुई स्थानको पहिरो हटाएपछि सडक सञ्चालनमा आएको जिल्ला प्रहरी कार्यालय सल्यानले जनाएको छ ।
कपुरकोट गाउँपालिका–५, खारखोलामा सोमबार राति ८ः५० बजे पहिरो खसेपछि अवरुद्ध भएको सडक मङ्गलबार बिहान १०ः१३ बजे खुलेको हो । सडक खुले पनि उक्त स्थानमा साना सवारीसाधनका लागि मात्रै आवागमन सञ्चालनमा आएको जिल्ला प्रहरी कार्यालयका सूचना अधिकारी प्रहरी निरीक्षक देवराज भट्टराईले जानकारी दिनुभयो ।
त्यस्तै, कपुरकोट गाउँपालिका–३ स्थित चोरखोलामा पनि सोमबार राति ८ः५० बजे पहिरो खसेपछि सडक अवरुद्ध भएको थियो । उक्त स्थानमा मंगलबार बिहान ९ः१३ बजे सडक सञ्चालनमा आएको हो ।
लगातारको वर्षाका कारण राप्ती लोकमार्गको सल्यान–दाङ खण्डमा पटकपटक पहिरो खस्दै आएको छ । पहिरोका कारण लामो समयसम्म सडक अवरुद्ध हुँदा यात्रु तथा सवारीसाधनले बीच बाटोमै सास्ती खेप्दै आएका छन् । खारखोलामा गएको पहिरोमा परी गएराति एकजनाको मृत्यु भएको छ भने एकजना घाइते भएका छन् ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया