किरियामा बसेकी महिलासँग सम्बन्धपछि दाजुभाइको मृत्यु, सिंगो गाउँमा त्रास

रौतहट, १८ असोज । भारतको उत्तर प्रदेशस्थित बिजनौरसँग जोडिएको एक गाउँमा एचआईभी संक्रमणका कारण दुई चचेरे दाजुभाइको मृत्यु भएपछि स्थानीयवासीमा सन्त्रास फैलिएको छ।

स्थानीय सञ्चारमाध्यमका अनुसार करिब दुई वर्षसम्म गाउँमा किरायामा बसेकी एक महिलासँग नजिकको सम्बन्धमा रहेका ५१ वर्षीय एक पुरुष र उनका ४३ वर्षीय चचेरे भाइ गम्भीर बिरामी परेका थिए। महिला गाउँबाट गएपछि दुवैमा स्वास्थ्य समस्या देखिएको बताइएको छ।

गम्भीर अवस्थामा पुगेपछि ५१ वर्षीय पुरुषलाई ऋषिकेशस्थित एम्स अस्पताल लगिएको थियो। त्यहाँ गरिएको परीक्षणमा उनी एचआईभी संक्रमित भएको पुष्टि भएको र उपचारकै क्रममा उनको मृत्यु भएको जनाइएको छ। उनको मृत्यु भएको तीन दिनपछि बुधबार राति उनका ४३ वर्षीय चचेरे भाइको पनि मृत्यु भएको बताइएको छ। उनको पनि एचआईभी संक्रमणकै कारण मृत्यु भएको स्थानीय स्वास्थ्य अधिकारीहरूले बताएका छन्।

दुवैको मृत्यु भएपछि गाउँमा उनीहरूसँगै सम्पर्कमा रहेका अन्य व्यक्तिबारे समेत स्थानीयमा चासो र चिन्ता बढेको छ। ती महिलाको घरमा अन्य मानिसहरूको पनि आउजाउ हुने गरेको बताइएकाले गाउँमा थप त्रास फैलिएको हो।

स्थिति संवेदनशील बनेपछि बिजनौरका मुख्य चिकित्सा अधिकारी डा. कौशलेन्द्र सिंहले गाउँमा स्वास्थ्य विभागको टोली पठाएर स्थानीयवासीलाई परामर्श दिन निर्देशन दिएका छन्। सम्भावित जोखिममा रहेका व्यक्तिलाई डर नमानी आधिकारिक स्वास्थ्य केन्द्रमा गोप्य रूपमा एचआईभी परीक्षण गराउन आग्रह गरिएको छ।

के भन्छ स्वास्थ्य विज्ञान ?

एचआईभी सामान्य सम्पर्क, एउटै घरमा बस्दा, हात मिलाउँदा, अँगालो हाल्दा वा एउटै भाँडामा खाना खाँदा सर्दैन। असुरक्षित यौनसम्पर्क, संक्रमित रगत तथा केही निश्चित शारीरिक तरल पदार्थको सम्पर्कबाट संक्रमण हुन सक्छ।

त्यसैले एउटै घटनाका आधारमा कुनै व्यक्ति वा समुदायलाई दोषी ठहर गर्नु वा गाउँभरि ‘संक्रमण फैलिएको’ निष्कर्ष निकाल्नु उचित हुँदैन। सम्बन्धित व्यक्तिले अनुमान वा हल्लाका आधारमा नभई प्रमाणित स्वास्थ्य संस्थामा एचआईभी परीक्षण र चिकित्सकीय परामर्श लिनु आवश्यक हुन्छ। यस घटनाले पनि असुरक्षित यौनसम्पर्कबाट हुने संक्रमणबारे सचेतना, समयमै परीक्षण र आवश्यक उपचारको महत्वलाई उजागर गरेको छ। सञ्जय मिश्रा/न्युज कारखाना