नवरात्रको दोस्रो दिन: शक्तिपीठ एवं देवी मन्दिरमा बिहानैदेखि भक्तजनको लर्को

काठमाडौं। दुर्गा पक्षको दोस्रो दिन अर्थात् नवरात्रका अवसरमा देशभरका शक्तिपीठ एवं देवी मन्दिरहरूमा बिहानैदेखि भक्तजनको चाप बढ्न थालेको छ। सामान्य अवस्थामा पनि देवीका मन्दिरहरूमा भीड लाग्ने गरेकामा आज दसैँको दोस्रो दिन भएकाले दर्शनार्थीहरूको बाक्लो लर्को लागेको स्थानीयवासीले जनाएका छन्।

राजधानीका गुह्येश्वरी, जयबागीश्वरी, मैतीदेवी, कालिकास्थान, नक्साल भगवती, भद्रकाली, शोभाभगवती, विजेश्वरी, इन्द्रायणी, रक्तकाली, श्वेतकाली, दक्षिणकाली, चामुण्डामाई, सुन्दरीमाई, बज्रयोगिनी, बङ्गलामुखी, टोखा चण्डेश्वरीलगायतका प्रमुख मन्दिरहरूमा बिहानैदेखि भक्तजनको लाम लागेको प्रत्यक्षदर्शीहरूले जनाएका छन्।

भक्तजनलाई आकर्षित र स्वागत गर्नका लागि शक्तिपीठ तथा देवी मन्दिरहरूलाई ध्वजापताकाले आकर्षक रूपमा सिँगारिएको छ। मन्दिर परिसरमा गुञ्जिएका देवीका भजन, मङ्गल धुन तथा देवी स्तोत्र वाचनले भक्तजनलाई मन्त्रमुग्ध बनाएको स्थानीय भक्तजनहरूले जनाएका छन्।

यसैक्रममा मैतीदेवी मन्दिर छिर्ने सडकमा आकर्षक द्वार निर्माण गरेर भक्तजनलाई स्वागत गर्ने प्रबन्ध मिलाइएको छ भने नक्साल भगवती मन्दिर परिसरलाई पनि विशेष रूपमा सजाइएको आयोजकहरूले जनाएका छन्।

नवरात्रका अवसरमा नौ वटा देवी मन्दिरको दर्शन गर्नुपर्ने धार्मिक मान्यता रहेकाले केही भक्तजनले प्रत्येक दिन फरक-फरक शक्तिपीठमा जाने गरी योजना बनाएको जानकारी दिएका छन्।

यसैगरी उपत्यका बाहिर रहेका प्रसिद्ध देवी मन्दिरहरूमा पनि भक्तजनको भीड उल्लेख्य रूपमा बढ्न थालेको छ। पूर्वको पाथीभरा, छिन्नमस्ता, गहवामाई, पलाञ्चोक, पाल्चोक, नाला भगवती, चण्डेश्वरी, मनकामना, इच्छाकामना, विन्ध्यवासिनी, बाग्लुङ कालिका, शैलेश्वरी, उग्रतारा, बडिमालिकालगायत देशभरका शक्तिपीठहरूमा दर्शनार्थीको ठूलो भीड लागेको सम्बन्धित मन्दिर व्यवस्थापन समितिहरूले जनाएका छन्।

शारदीय नवरात्रका रूपमा समेत चिनिने यस अवसरमा शक्तिपीठहरूको दर्शन गर्नाले मनले चिताएको मनोकामना पूरा हुने धार्मिक विश्वास रहेको पण्डितहरूले जनाएका छन्। यस पावन अवसरमा महाकाली, महालक्ष्मी र महासरस्वतीको पनि विशेष पूजा आराधना गरिने उनीहरूले बताएका छन्।

नौ दिनसम्म विशेष साधना गरे मनले चिताएको पुग्ने र अलौकिक शक्ति प्राप्त हुने धार्मिक विश्वास रहिआएको छ। नवौँ दिनसम्म विधिपूर्वक पूजाआराधना गरिएको दुर्गादेवीको प्रसाद विजयादशमीका दिन मान्यजनका हातबाट लगाउने परम्परा रहेको धर्मशास्त्रविद्हरूले जनाएका छन्।

दशैंको मुख्य दिन विजयादशमीका अवसरमा घटस्थापनामा राखिएको घडाबाट विधिपूर्वक अभिषेक गरी दुर्गाको प्रसादका रूपमा जमरा र रातो टीका लगाइने उनीहरूले बताएका छन्। केही समुदाय तथा जातिले भने यस अवसरमा सेतो अक्षताको टीका लगाउने गरेको उनीहरूले जनाएका छन्।

यसैगरी, दसैँ नजिकिएसँगै बजारमा किनमेल गर्नेको घुइँचो पनि तीव्र रूपमा बढ्न थालेको छ। शहरका मुख्य मुख्य बजारहरूमा खाद्यान्न, लत्ताकपडालगायतका सामान किनमेल गर्नेहरूको लर्को देखिएको छ।

कतिपय मानिसहरू आ-आफ्नो थातथलो फर्किसकेका छन् भने धेरैजसो जाने अन्तिम तयारीमा जुटेको यात्रुहरूले जनाएका छन्। यद्यपि काठमाडौँ उपत्यका छाडेर बाहिर जाने यात्रुहरूले सार्वजनिक यातायात सहज र पर्याप्त नभएको भन्दै तीव्र गुनासो गरेका छन्।

सार्वजनिक यातायातलाई सही तरिकाले व्यवस्थित नगर्दा दसैँ-तिहारजस्ता ठूला चाडपर्वका वेला यात्रुहरूले बर्सेनि धेरै सास्ती खेप्नुपर्ने बाध्यता रहेको भुक्तभोगीहरूले जनाएका छन्।

मुलुकमा तीन तहको सरकारको संरचना बनिसक्दा पनि सार्वजनिक यातायात व्यवस्थापन सुदृढ गर्न कसैको ध्यान जान नसकेको आममानिसले दुःखेसो व्यक्त गरेका छन्। यस वर्ष गएको अविरल बाढी र पहिरोका कारण रसुवा, धादिङ, गोरखा, मुस्ताङलगायतका जिल्लाहरूमा सडक तथा पुल संरचनामा क्षति पुगेकाले आवतजावतमा थप समस्या पैदा भएको सर्वसाधारणले जनाएका छन्।