ब्राजिलमा लुलाको पुनरागमन, चुनावी नतिजालाई लिएर ट्रम्पको आलोचना

काठमाडौं । अमेरिकी राष्ट्रपति डोनाल्ड ट्रम्पले ब्राजिलको चुनावलाई ‘लज्जास्पद’ र ‘ब्राजिलका जनताका लागि अपमानजनक’ भनी टिप्पणी गरेका छन्।

वाशिंगटनमा पत्रकारीहरूसँग कुराकानी गर्दै ट्रम्पले भने, “मैले चुनावमा कसैको पक्ष पनि लिइनँ, तर जब मैले ब्राजिलमा जे-जति भयो, त्यो देखेँ, तब त्यसलाई शब्दमा व्यक्त गर्न गाह्रो थियो।”

ब्राजिलका नेता लुइज इनासियो लुला दा सिल्भाले शानदार पुनरागमन गर्दै राष्ट्रपति चुनावमा विजय हासिल गरेका छन्।

यो जितसँगै वर्कर्स पार्टीका ८० वर्षीय नेता लुलालाई चौथो पटक राष्ट्रपति बन्ने अवसर प्राप्त भएको छ।

उनले देशको राष्ट्रपति चुनावमा कट्टर दक्षिणपन्थी प्रतिद्वन्द्वी तथा लिबरल पार्टीका नेता फ्लाभियो बोल्सनारोलाई थोरै मतान्तरले पराजित गरे।

लगभग सबै मतगणना सम्पन्न भएपछि, आइतबार ल्याटिन अमेरिकाको सबैभन्दा ठूलो लोकतन्त्रमा सम्पन्न चुनावको दोस्रो चरणमा लुलाले ५१.७६ प्रतिशत भोट प्राप्त गरे।

जबकि जेलमा रहेका पूर्व राष्ट्रपति जायर बोल्सनारोका छोरा फ्लाभियो बोल्सनारोले ४८.२४ प्रतिशत भोट पाए।

लुलाको यो जित थुप्रै चुनावी सर्वेक्षणका अनुमानहरू विपरीत रहेको छ। ती सर्वेक्षणहरूमा बोल्सनारोलाई सामान्य अग्रता दिइएको थियो।

यस महिनाको सुरुमा पहिलो चरणको मतदानमा ४५ वर्षीय सिनेटर फ्लाभियो बोल्सनारोले करिब दुई प्रतिशतको अग्रता हासिल गरेका थिए।