चितवन मेडिकल कजेल तोडफोड गर्ने एक दर्जन प्रदर्शनकारी पक्राउ

काठमाण्डौः चितवन मेडिकल कलेजको शिक्षण अस्पतालमा उपचारका क्रममा नवलपरासीकी बिरामी आशा ज्ञवालीको शल्यकृया गर्ने क्रममा मृत्यु भएपछि चितवन मेडिकल कलेज तोडफोड गरेको आरोपमा प्रहरीले ११ जनालाई नियन्त्रणमा लिएको छ ।

आइतबार मेडिकल कलेज तोडफोड गर्ने १ महिला सहित ११ जनालाई पक्राउ गरिएको जिल्ला प्रहरी कार्यालय चितवनले जनाएको छ । मृतकका आफन्तले अस्पतालको आइसियु, सिसियु, गेट लगायतका क्षेत्रमा तोडफोड गरेका थिए।

पक्राउ परेकाहरु विरुद्ध सोमबार मेडिकल कलेजले जाहेरी दिएको थियो । सोही जाहेरीको आधारमा प्रहरीले थप अनुसन्धान गरेर कारबाही गर्ने तयारी गरेको जनाएको छ । प्रहरीले पक्राउ गरेका ११ जना विरुद्ध अभद्र व्यवहारको कसुरमा अनुसन्धान सुरु गरेको जनाएको छ ।

क्षतिको परिमाणको आधारमा उनीहरुलाई सांगठनिक अपराधमा समेत मुद्दा चलाउन सकिने प्रहरीले जनाएको छ । एसपी मल्लका अनुसार भोलीका दिनमा पनि यस्ता घटना दोहोरिन नदिन तोडफोड गर्ने जुनसुकै समुहलाई कानूनी दायरामा ल्याएरै छाड्ने बताएका हुन् ।