असार २३, २०८२ सोमबार
July 7, 2025
युग खबर
२०७७ माघ २०, मंगलबार
काठमाण्डौंः राष्ट्रिय महिला लिग फुटबलअन्तर्गत आज भएको खेलमा स्याङ्जाको वालिङ नगरपालिकाले रौतहटको चन्द्रपुर नगरपालिकालाई पराजित गर्दै लिगको चौथो स्थानमा उक्लिएको छ ।
ललितपुरको सातदोबाटोस्थित एन्फा कम्प्लेक्समा भएको खेलमा वालिङले चन्द्रपुरलाई ३–० गोलअन्तरले हराएको हो । वालिङ ६ खेलबाट ८ अङ्क जोड्दै चौथो स्थानमा उक्लिएको हो ।
वालिङका लागि विदेशी खेलाडी मेथो एलुड रुथले दुई तथा टोउटा नोइल्लीले एक गोल गर्नुभयो । खेलको ३७औँ मिनेटमा टोउटा नोइल्लीले पहिलो गोल गर्नुभएको थियो । खेलको ४४औँ मिनेटमा मेथो एलुड रुथले वालिङका लागि दोस्रो गोल गर्नुभयो । यस्तै खेलको ५४औँ मिनेटमा रुथले व्यक्तिगत दोस्रो गोल गर्नुभयो ।
चन्द्रपुर ६ खेलमा ३ अङ्कका साथ लिगको छैटौँ स्थानमा छ । यस्तै एपीएफ क्लब ६ खेलबाट १८ अङ्क जोड्दै लिगको पहिलो स्थानमा तथा आर्मी क्लब १० अङ्कका साथ दोस्रो स्थानमा छ । चौदण्डीगढी नगरपालिका अङ्कविहीन रहँदै लिगको पुछारमा रहेको छ ।
लिगमा बुधबार पहिलो खेल चौदण्डीगढी र त्रिभुवन आर्मी फुटबल क्लबबीच तथा दोस्रो खेल नेपाल पुलिस क्लब र विराटनगर महानगरपालिकाबीच हुने अखिल नेपाल फुटबल सङ्घ (एन्फा)ले जनाएको छ । रासस
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया