अनलाइन बिक्रेता कम्पनी ‘दराज’माथि छानबिन हुँदै

काठमाडौं । वाणिज्य आपूर्ति तथा उपभोक्ता हित संरक्षण विभागले अनलाइन बिक्रेता कम्पनी दराजविरुद्ध छानबिन सुरु गरेको छ। वस्तु बिक्री गर्दा ठगी गरेको भन्दै उजुरी परेपछि विभागले दराजविरुद्ध छानबिन थालेको हो।

एकथोक सामान अर्डर गर्दा अर्कै सामान आइपुग्ने गरेको भन्दै उजुरी परेपछि छानबिन सुरु गरेको विभागले जनाएको छ।

विभागका अनुसार दराजविरुद्ध यही कात्तिक २१ गते उजुरी परेको थियो। विभागले शुक्रबार दराजको नक्सालस्थित कार्यालय अनुगमन गरी २४ घण्टाभित्र उपस्थित हुन पुर्जी काटेको थियो। दराजका प्रतिनिधि आइतबार विभाग आएर विभागका अधिकारीहरुसँग छलफल गरेका थिए।

दराज कम्पनीले आफ्नो वेबसाइटमा सामान बिक्रीको लागि राखेको नभई अन्य बिक्रेताले आफ्नो वेबसाइट प्रयोग गरी सामान बिक्री गरेको विभागमा बयान दिएका छन्। सोही कारण दराजमार्फत बिक्री हुने सामानमा दराजले नभई बिक्रेताले दिएको बिलबीजक जारी हुने उनीहरुले बताएका थिए।

उपभोक्ता संरक्षण ऐन २०७५ अनुसार खरिद तथा बिक्री गर्दा बिलबीजक अनिवार्य लिने दिने गर्नुपर्छ।