चिनियाँ अनुदानको आठ लाख  डोज खोप सोमबार आउँदै

काठमाण्डौः चीनले अनुदानमा दिने आठ लाख डोज कोभिडविरुद्धको खोप सोमबार नेपाल ल्याइने भएको छ । स्वास्थ्य मन्त्रालयका अनुसार खोप लिन चार्टर विमान आइतबार बिहान चीन जाँदै छ । अनुदानको सो खोप बेइजिङमा तयार अवस्थामा छ । १८ माघमा तीन लाख खोप सहायता गर्ने बताएको चीनले १७ फागुनमा त्यसलाई बढाएर आठ लाख खोप दिने घोषणा गरेको थियो । यसअघि भारतले १० लाख डोज खोप अनुदान दिएको थियो ।

सरकारले त्रिभुवन विमानस्थलमा सघन उपचार कक्षसहितको हेल्थ डेक्स बनाउने प्रक्रिया छिटै सुरु गर्ने भएको छ । हेल्थ डेस्क रहने भवनका लागि जग्गा उपलब्ध भइसकेकाले टेन्डर निकाल्ने तयारी भएको स्वास्थ्य सेवा विभागले जनाएको छ ।

अघिल्लो वर्ष माघमा नेपालमा कोरोना भाइरसको संक्रमण देखिएपछि सरकारले विमानस्थलमा सुविधासम्पन्न हेल्थ डेस्क बनाउने निर्णय गरी बजेटमा समावेश गरेको थियो । तर, विमानस्थलले जग्गा नदिएपछि काम अगाडि बढ्न पाएको थिएन । विभागका इपिडिमियोलोजी तथा रोग नियन्त्रण महाशाखाका निर्देशक डा. कृष्ण पौडेलले नयाँ पत्रिकासँग भने, ‘त्रिभुवन विमानस्थलले जग्गा दिएको छ । अब चाँडै टेन्डर भई काम अगाडि बढ्छ ।’

कोरोनाको दोस्रो लहर विश्वसँगै छिमेकी भारतमा पनि देखिएपछि सरकारले तत्काल हेल्थ डेस्क बनाउने निर्णय गरेको हो । हेल्थ डेस्कका लागि १८ जनाको दरबन्दी स्वास्थ्य मन्त्रालयबाट हालै स्वीकृत भएको छ । नेपालको एक मात्र अन्तर्राष्ट्रिय विमानस्थलबाट दैनिक ६–७ हजार मानिस नेपाल भित्रिने गरेका छन् ।