अविश्वास प्रस्ताव दर्ता गर्न कांग्रेस सांसदको दबाब

काठमाडौंः प्रमुख प्रतिपक्ष कांग्रेसमा वैकल्पिक सरकार निर्माणका लागि प्रधानमन्त्री केपी शर्मा ओलीविरुद्ध तत्काल अविश्वास प्रस्ताव दर्ता गराउनुपर्ने मत सशक्त बनेको छ ।

प्रधानमन्त्रीले प्रतिनिधिसभामा राखेको विश्वासको प्रस्तावको एजेन्डालाई लिएर शनिबार बसेको पार्टीको संसदीय दल बैठकमा अधिकांश सांसदले प्रधानमन्त्री ओलीविरुद्ध अविश्वास प्रस्ताव लैजान जोड दिएका हुन् ।

विश्वासको मत नपाउनेबित्तिकै प्रधानमन्त्री ओली राष्ट्रपतिको सहयोगमा संविधानको धारा ७६ (३) अनुसार अल्पमतको सरकार बनाउने बाटोमा अघि बढ्न सक्ने भन्दै सांसदहरूले त्यसलाई रोक्न अविश्वास प्रस्ताव दर्ता गराउनुपर्ने बताएका हुन् । बहुमत सांसदको त्यस्तो धारणा आएपछि वैकल्पिक सरकार निर्माणका लागि निर्णायक ढंगले छलफल अघि बढाउने दलले निर्णय गरेको नेता दिलेन्द्र बडूले बताए ।

‘विश्वासको मत असफल भइसकेपछि संसद् भंग गर्ने बाटोमा प्रधानमन्त्री जाने सक्ने सम्भावना देखिएकाले त्यसलाई रोक्न वैकल्पिक सरकारका लागि निर्णायक ढंगको छलफल अघि बढाउनुपर्ने निर्णय दलले गरेको छ,’ बैठकपछि बडूले भने । बैठकले प्रधानमन्त्रीले राखेको विश्वासको प्रस्तावलाई असफल बनाउन अन्य राजनीतिक दलसँगसमेत आग्रह गर्ने निर्णय लिएको छ । पार्टीको पदाधिकारी बैठकले यसअघि नै प्रधानमन्त्री ओलीलाई विश्वासको मत नदिने निर्णय गरेको थियो । कान्तिपुर दैनिक