१३औं पटक फ्रेन्च ओपन विजेता नाडाल नोभाकसँग पराजित

काठमाडौंः फ्रेन्च ओपन प्रतियोगिताको सेमी फाइनल खेलमा साविक विजेता रफाएल नाडाल पराजित भएका छन्।

पेरिसको ‘फिलिप च्याटरियर कोर्ट’मा गए राति भएको सेमी फाइनल खेलमा विश्व नम्बर १ नोभाक जोकोभिचले १३ पटक फ्रेन्च ओपन विजेता नाडाललाई ३-६, ६-३, ७-६ (४), ६-२ को सेटमा पराजित गरेका हुन्।

विश्व नम्बर ३ नाडालले पहिलो सेट सजिलै जितेपनि जोकोभिचले त्यसपछि खेलमा उत्कृष्ट पुनरागमन गरेका हुन्। ‘क्ले कोर्ट’का राजा भनेर चर्चित नाडाल यस पटक आफ्नो २१औं ‘ग्रान्ड स्ल्याम’ उपाधिको दाउमा थिए।

गत वर्षको फ्रेन्च ओपन फाइनलमा यी दुई टेनिसका सुपरस्टार खेलाडीहरु भिड्दा नाडालको तराजु भारी रहेको थियो। यस वर्ष नाडाललाई पराजित गर्ने क्रममा जोकोभिचले गए रातिको खेलमा कुल १४२ अंक प्राप्त गरे।

अब फाइनलको लागि १८ पटक ‘ग्रान्ड स्ल्याम’ विजेता जोकोभिचले ग्रीसका स्टेफानोस ट्सिसिपासको सामना गर्नेछन्। आईतवार खेलिने फाइनल खेलमा विश्व नम्बर ५ ट्सिसिपास आफ्नो पहिलो ‘ग्रान्ड स्ल्याम’ उपाधिका लागि ‘फिलिप च्याटरियर कोर्ट’मा प्रवेश गर्नेछन्।

ट्सिसिपासले हिजै सम्पन्न पहिलो सेमी फाइनल खेलमा विश्व नम्बर ६ जर्मन खेलाडी एलेक्जेन्डर जेभरेभलाई ६-३, ६-३, ४-६, ४-६ र ६-३ को सेटमा पराजित गरेका थिए।