भोलीदेखी देशभर इन्धन वितरणमा रोक लगाउने पाँच विद्यार्थी संगठनको घोषणा

काठमाडौंः पेट्रोलियम पदार्थमा भएको मूल्यवृद्धिको विरुद्धमा गर्दै आन्दोलन गर्दे आएका पाँच विद्यार्थी संगठनले असार ३० गते देखि देशभर इन्धन वितरणमा रोक लगाउने घोषणा गरेका छन् ।

पाँच विद्यार्थी संगठनले नेपाल पेट्रोलियम राष्ट्रिय एसोसियसन,नेपाल पेट्रोलियम ढुवानी व्यावसायी महासंघका अध्यक्षालाई ध्यानाकर्षण गराउँदै देशभरका पेट्रोल पम्प, पेट्रोलियम डिलर्स र ढुवानी ट्याङ्करहरु बन्द गर्ने जनाएका हुन् ।

उनिहरुले जनताको ढाड सेक्ने गरी भएको मुल्यवृद्धि फिर्तागर्न गरिएको आन्दोलनमा एशोसिएसन मातहतका सम्पूर्ण पेट्रोल पम्प र ढुवानी ट्यांकहरु बन्द गरी आन्दोलनमा सहयोग गर्न आग्रह गरेका छन् ।

साथै ध्यानाकर्षणको अवज्ञा गरिएमा त्यसबाट उत्पन्न हुने परिस्थितिको सबै जिम्मेवारी व्यवसायी र एसोसियसन आफै हुने उनीहरूले चेतावनी दिएका छन् ।

नेविसंघका अध्यक्ष राजीव ढुंगाना, अखिल (क्रान्तिकारी)का अध्यक्ष रञ्जित तामाङ, अनेरास्ववियूका अध्यक्ष सुरेश पराजुली, समाजवादी विद्यार्थी युनियनका अध्यक्ष रुपनारायण श्रेष्ठ र अखिल छैठौंका अध्यक्ष विमल पोखरेलले संयुक्त रुपमा पेट्रोलियम डिलर्स राष्ट्रिय एसोसियसन र ढुवानी व्यवसायी महासंघलाई ध्यानाकर्षण पत्र बुझाएका हुन ।