कर्णाली सरकारले छोरी सुरक्षा कार्यक्रम जाजरकोटबाट सुरु गर्ने

जाजरकोट । कर्णाली प्रदेश सरकारले जाजरकोटबाट छोरी सुरक्षा कार्यक्रम सुरु गर्ने भएको छ। छोरीहरुको लागि स्वर्णिम भविष्य निर्माणमा सहयोग पुर्‍याउन आगामी वर्षदेखि छोरी जन्मिने बित्तिकै बैंकमा एक हजारको खाता खोल्ने प्रदेश सरकारले तयारी गरेको कर्णाली प्रदेश सरकारका आर्थिक मामिला तथा योजनामन्त्री प्रकाश ज्वालाले बताएका छन।

उनले यो छोरी सुरक्षा कार्यक्रम जाजरकोटबाटै सुरु गर्ने तयारीमा आफुहरु लागेको पनि बताएका छन। मन्त्री ज्वालाले उक्त कुरा केहि दिनअघि जाजरकोट सदरमुकाम खलंगामा आयोजित एक कार्यक्रममा बताएका हुन्। मन्त्री ज्वालाले दुई सन्तान अर्थात छोराछोरी या छोरीछोरी जन्माउने परिवारका लागि मात्र यो योजना लागू हुने बताएका छन।

छोरीहरुका लागि सुन्दर र सुरक्षित भविष्य निर्माणमा सहयोग पुर्‍याउन लगातार दुई छोरी जन्मिए या एउटा मात्र छोरी जन्मिए पनि उनको नाममा प्रदेश सरकारले एक हजारको बैंक खाता खोल्दै मासिक रुपमा ५ सय रुपैयाँ २० वर्षसम्म जम्मा गरिदिने पनि बताएका छन।

छोरीको नाममा जम्मा हुने रकमको लगानीबाट हुने नाफा र सावा सबै जोडेर छोरीको जीवन आत्मनिर्भर र सुन्दर भविष्य निर्माणमा सहयोग गर्ने सरकारको लक्ष रहेको मन्त्री ज्वालाले बताएका छन। सरकारले बैंक खाता खोलिदिएपछि र मासिक बचत गर्न सुरु गरेपछि २० वर्षसम्म विहे गर्न नपाइने, विद्यालयको पढाइ छोड्न नपाइने र आफुलाई आत्मनिर्भर बनाउने काममा सधै सकारात्मक क्रियाकलापमा सहभागी हुनुपर्ने सर्तहरु राखिने पनि मन्त्री ज्वालाले बताएका छन।

बाल विवाहको दर स्कुले केटाकेटीहरुमा भयावह देखिएको यसले समाजमा धेरै प्रकारका समस्याहरु बढ्दै गएकोले यसलाई नियन्त्रण गर्न आफुहरुले छोरी सुरक्षा कार्यक्रम सुरु गर्न लागेको पनि मन्त्री ज्वालाले बताएका छन। कर्णाली प्रदेश सरकारले सामाजिक विकास मन्त्रालय अन्तरगत छोरी सुरक्षा कार्यक्रम सन्चालन गर्न लागेको बताइएको छ।

कर्णाली प्रदेशका जाजरकोट लगाएतका जिल्लाहरुमा वालविवाहको दर उच्च रहेको र यसलाई नियन्त्रण गर्नका लागि सरकारले उचित रुपमा दिर्घकालीन नीति र पहल लिनुपर्ने सरोकारवालाहरुको भनाइ छ।