श्रीमतीको हत्या पश्चात श्रीमानले गरे आत्महत्या

काठमाण्डौंः भोजपुरको षडानन्द नगरपालिका -९ ताल खर्कका ४० वर्षीय बुद्धिमान राईले खुकुरी प्रहार गरी श्रीमतीको हत्या गरेका छन् ।

राईले शुक्रवार राति २८ वर्षीया श्रीमती इन्द्रकलालाई खुकुरी प्रहार गरी हत्या गरेको जिल्ला प्रहरी कार्यालय भोजपुरले जनाएको छ। प्रहरीका अनुसार राईले श्रीमतीको हत्या गरी घर नजिकैको दुधिलोको रुखमा झुण्डिएर आत्माहत्या गरेका छन् ।

बाबुले आमामाथि खुकुरी प्रहार गरेको देखेपछि ८ वर्षीय छोराले स्थानीय छिमेकीलाई खबर गरेका थिए। घटनाको जानकारी पाएपछि पुग्दा इन्द्रकलाको मृत्यु भइसकेको स्थानीयले जानकारी दिएका छन्। बुद्धिमानको पनि खोजी गर्दा रुखमा झुण्डिएको अवस्थामा फेला परेका थिए ।

घटनाबारे थप अनुसन्धान भइरहेको जिल्ला प्रहरी कार्यालय भोजपुरका डिएसपी राजकुमार राईले बताए। दुवैको शव पोस्टमार्ट गर्न अस्पताल लगिएको छ ।