बागमती प्रदेश: विभूषण सिफारिससम्बन्धी विधेयक सर्वसम्मतले स्वीकृत

काठमाण्डौंः बागमती प्रदेशको प्रदेश सभा बैठकले विभूषण सिफारिससम्बन्धी विधेयक सर्वसम्मतले स्वीकृत गरेको छ ।

सोमबार बसेको प्रदेश सभा बैठकले विभूषण सिफारिस तथा सम्मान र पदकसम्बन्धी ऐन २०७६ लाई संशोधन गर्न बनेको विधेयक सर्वसम्मतिले स्वीकृत गरेको हो ।

सोमबार बसेको प्रदेश सभा बैठकमा उक्त विधेयकमाथि प्रदेश मामिला समितिले तयार पारेको प्रतिवेदन समितिका सभापति माधव प्रसाद पौडेलले पेश गर्नुभएको थियो । प्रदेशका आन्तरिक मामिला तथा कानून मन्त्री कृष्ण प्रसाद खनालले उक्त विधेयक पारित गरियोस् भन्ने प्रस्ताव पेश गर्नुभएको थियो ।

बागमती प्रदेश सभाको बैठक अर्को सूचना सार्वजनिक नभएसम्मका लागि स्थगित गरिएको छ ।

यसैबीच बागमती प्रदेशका स्वास्थ्य मन्त्री निमा लामाले विश्वव्यापी रुपमा फैलिरहेको कोरोनाको जोखिम बढ्दै गएकोले स्वास्थ्य मापदण्ड अपनाउन आग्रह गर्नुभएको छ ।

सोमबार बसेको प्रदेश सभा बैठकमा सार्वजनिक महत्त्वको विषयमा जानकारी गराउनुहुँदै मन्त्री लामाले विश्व स्वास्थ्य सङ्गठनले जारी गरेको स्वास्थ्य मापदण्ड अनिवार्य रुपमा पालन गर्न सबैलाई अनुरोध गर्नुभएको हो ।