म बढी बोल्दिनँ, यसमा मेरो केही प्रतिक्रिया छैन,सबै विषयको छानबिन हुनुपर्छ : बाँस्कोटा

काठमाडौँ । निवासमा बम विष्फोट भएको घटनामा पूर्वमन्त्री गोकुल बाँस्कोटाले सबै विषयको छानबिन हुनुपर्ने प्रतिक्रिया दिएका छन् ।

बुधबार बिहान मन्त्री बाँस्कोटाको मध्यपुरथिमि नगरपालिका–१ लोकन्थली मनोहरा फाँटस्थित निवासमा शक्तिशाली विष्फोट गराइएको थियो। यो घटना प्रतिबन्धित विप्लव समूहले गराएकोमा सुरक्षा निकाय स्पष्ट छ ।

‘मैले सम्पूर्ण रुपमा सबै विषयहरुको छानबिन होस् भनेरै राजीनामा दिएको हो, अहिले यो सब कसले र किन गरिरहेको छ, म बढी बोल्दिनँ, यसमा मेरो केही प्रतिक्रिया छैन, सबै विषयको छानबिन हुनुपर्छ, बाँस्कोटाले भने ।

सेक्युरिटी प्रिन्टर खरिद प्रक्रियामा ७० करोड कमिसनको मोलतोल गरेको अडियो रेकर्ड सार्वजनिक भएपछि बाँस्कोटाले मन्त्री पदबाट राजीनामा दिएका थिए ।
कमिसन प्रकरणमा मुछिएका बाँस्कोटाले राजीनामा दिएपछि उनीलक्षित आक्रमण हुन सक्ने भन्दै प्रहरी अलर्ट थियो ।

स्रोतका अनुसार बास्कोटा प्रकरणलगत्तै प्रहरीको प्रति आतङ्कवाद हेर्ने विषेश ब्युरोले सबै प्रहरी यूनिटलाई उनीविरुद्ध नेत्र विक्रम चन्द विप्लव नेतृत्वको नेकपाले आक्रमण गर्न सक्ने लिखित सर्कुलर नै जारी गरेको थियो।