१७ वर्षीया किशोरीलाई ट्रकभित्र लगेर सामूहिक बलात्कार

काठमाडौं । काठममाडौंको थानकोट क्षेत्रमा ट्रकभित्र लगेर एक किशोरीलाई सामूहिक बलात्कार गरिएको छ।

चन्द्रागिरि नगरपालिका १५ तीनथानामा पार्किङ गरेर राखिएको ना ३ ख ६९४ ट्रकभित्रै चालक तथा सहचालक ३ जना मिलेर किशोरीलाई सामूहिक बलात्कार गरेका हुन्।

थानकोटस्थित महानगरीय प्रहरी वृत्तका डीएसपी घनश्याम श्रेष्ठका अनुसार घटना मंगलबारको हो।

त्यस दिन बिहानै धादिङकी ती किशोरी घर जान गाडी कुरेर बसेकी थिइन्। त्यस क्रममा तीन जनाले फेला पारी उनलाई घर पुर्‍याइदिने भन्दै सडक किनारमा पार्किङ गरी राखिएको ट्रकभित्र लगेर सामूहिक बलात्कार गरेका हुन्।

बलात्कारमा संलग्न आरोपमा प्रहरीले तीन जनलाई पक्राउ गरिसकेको छ।

‘घटनामा संलग्न ३ जनालाई नियन्त्रणमा लिएका छौं,’ डीएसपी श्रेष्ठले भने, ‘घटनाको गम्भीर ढंगले अनुसन्धान गरिरहेका छौं।’

उनका अनुसार सिन्धुलीको सुनकोसी गाउँपालिका ९ का पासाङ तामाङ, रामेछापको गोकुलगंगा गाउँपालिका २ का कपिल खड्का र दाङ राप्ती गाउँपालिका १ का सञ्जय घर्ती मगरलाई पक्राउ गरिएको हो। उनीहरू २० देखि २५ वर्षसम्म उमेरका रहेको प्रहरीले जनाएको छ।

पक्राउ परेकाहरूलाई थानकोट प्रहरी वृतको हिरासतमा राखेर प्रहरीले घटनान अनुसन्धान अघि बढाएको छ।

पीडित किशोरीलाई भने माइती नेपाल संस्थाको जिम्मा लगाइएको थानकोट प्रहरीले जानकारी दिएको छ।