प्रधानमन्त्रीलाई मुद्दा लगाउनै पाइँदैन भनेको होइनः बाबुराम भट्टराई

काठमाण्डौंः पूर्व प्रधानमन्त्री बाबुराम भट्टराईले युद्धकालीन मुद्दा नियमित अदालतले नभई सत्य निरूपण तथा मेलमिलाप आयोगले हेर्नुपर्ने बताएका छन्।

सोमबार बिहान सामाजिक सञ्जालमा उनले प्रधानमन्त्री भएका वेला आफू मुद्दाका कारण अदालतमा हाजिर भएको उल्लेख गर्दै बहालवाला प्रधानमन्त्रीलाई मुद्दा नै लगाउन हुँदैन भन्ने नरहेको बताएका हुन्। तर‚ युद्धकालीन मुद्दा शान्ति सम्झौता अनुसार सत्य निरूपण तथा मेलमिलाप आयोगले हेर्नुपर्ने उनले स्पष्टीकरण दिएका छन्।

“बहालवाला प्रमलाई मुद्दा लगाउनै पाइन्न भनेको हैन! मज्जाले पाइन्छ! म आफैं प्रम छँदा थुप्रै मुद्दा खेपेको छु, अदालतमा हाजिर भएको छु‚” भट्टराईले लेखेका छन्‚ “तर शान्ति सम्झौता अनुसार जनयुद्धकालीन मुद्दा टीआरसी (सत्य निरूपण तथा मेलमिलाप आयोग)ले हेर्ने हो, नियमित अदालतले हैन!”

नेपाल समाजवादी पार्टीका अध्यक्ष समेत रहेका भट्टराईले  प्रधानमन्त्री पुष्पकमल दाहालको हकमा पनि सोही प्रक्रिया लागू हुने बताएका छन्। उनले लेखेका छन्‚ “प्रम प्रचण्डको हकमा पनि त्यही हो! आवेग हैन विवेकले काम गरौं!”

भट्टराईले आइतबार एक कार्यक्रममा बहालवाला प्रधानमन्त्रीलाई मुद्दा लगाएर जिस्क्याउन खोजिएको बताएका थिए। आफ्ना त्यही अभिव्यक्तिलाई प्रस्ट्याउन उनले सामाजिक सञ्जालमा लेखेका हुन्।