गोठाटारमा गौरक्ष महायज्ञ तथा श्रीमद्भागवत सप्ताह ज्ञानमहायज्ञ हुने

काठमाडौंः असहाय गाईबाच्छा संरक्षण हेतु गौरक्ष महायज्ञ हुने भएको छ । असहाय गाईबाच्छा संरक्षण हेतु यही वैशाख २२ गतेदेखि २९ गतेसम्म कागेश्वरी मनोहरा नगरपालिका-८ गोठाटारमा गौरक्ष महायज्ञ तथा श्रीमद्भागवत सप्ताह ज्ञानमहायज्ञ हुने भएको हो ।

यो ज्ञानमहायज्ञ वाचक प्रवीण पण्डित दीनबन्धु पोखरेलको वाचनमा हुने अभियानका अध्यक्ष उत्तम पुडासैनीले जानकारी गराउनुभयो । ‘राज्यले गाईलाई राष्ट्रिय जनावर भने पनि संरक्षण गर्न सकेको छैन । साना-साना गाईबच्छाको रोदन देखेर यो काम हामीले गर्न लागेका हौँ,’ पुडासैनीले भन्नुभयो ।

अध्यक्ष पुडासैनीले भन्नुभयो, ‘वर्तमान अवस्थामा असहाय गाईबाच्छाको व्यवस्थापनका सन्दर्भमा सर्वत्र समस्याका रुपमा देखिएको छ । सरकारी नीतिको अभाव अनि किसानहरूमा देखिएको नैतिकताको खडेरीका कारण समस्या आएको हो ।’ गाईबाच्छा संरक्षण अभियानकर्ताहरूले लामो समयदेखि बाटोमा अलपत्र छाडिएका गाईबाच्छाहरूको संरक्षण गर्दै आएका छन् ।