गर्मी बढेपछि गोरखाका विद्यालय बन्द

काठमाडौंः गर्मी अत्यधिक बढेपछि गोरखाको पालुङटार नगरपालिकाले नगरक्षेत्र भित्रका सबै विधालयमा पठनपाठन बन्द गरेको छ। गर्मीले विद्यालयमा पठनपाठन गर्न नसक्ने भएपछि नगरपालिकाले नगरक्षेत्रका ५३ वटै विधालय बन्द गर्ने निर्णय गरेको हो। ती सबै विद्यालय तीन दिन बन्द रहने पालुङटार नगरपालिकाका नगरप्रमुख विवस चिन्तनले जानकारी दिए।

‘गर्मी ह्वात्तै बढेपछि बालबालिकाहरूको स्वास्थ्यमा समेत असर पर्न सक्ने भएकाले विद्यालयहरू बन्द गरिएको हो,’ उनले भने, ‘अहिले दिइएको बिदालाई आउँदो बर्खे बिदाबाट कट्टी गर्ने गरी २८ आइतबारदेखि मंगलबारसम्म सम्पूर्ण विधालयहरू बन्द गर्ने निर्णय गरिएको हो।’

गर्मी कम नभए निर्णय गरेर बिदा थप लम्ब्याउन सकिने नगरप्रमुख चिन्तनको भनाइ छ। ‘विद्यालयका भवनसमेत तातेर दिउँसोको समयमा बालबालिकाहरू कक्षा कोठाभित्र पनि बस्नै नसक्ने अवस्था छ,’ उनले भने, ‘यस्तो अवस्थामा विद्यालय बन्द गर्नु नै उचित हुने देखेर केही दिन पठनपाठन रोकिएको हो।’

पालुङटार क्षेत्रमा पछिल्लो समय ४० डिग्रीभन्दा बढी तापक्रम मापन गरिएको नगरप्रमुख चिन्तनले बताए। ‘हिजो आज तापक्रम घट्नुभन्दा झनझन बढ्दै गएको छ,’ उनले भने, ‘ठूला मानिसहरूलाई दिनको समयमा घरबाहिर निस्किएर हिडडुल गर्न कठिन भएको छ।’

पालुङटार नगरपालिका भित्र ८ हजारभन्दा बढी विद्यार्थीहरू अध्ययनरत रहेको नगरपालिकाका शिक्षा, युवा तथा खेलकुद शाखाका अधिकृत माधव पोखरेलले जानकारी दिए।

गर्मीका कारण धुवाकोट, मिरकोट, च्याङली, पालुङटार, ठाटीपोखरी क्षेत्रका विद्यालयमा अध्ययनरत विद्यार्थीहरू बढी प्रभावित भएको नगरपालिकाले जनाएको छ।