लाइभले गर्दा देश विदेशका कार्यकर्ता जोडिन पाए : पुरञ्जन आचार्य (अन्तवार्ता)

कांग्रेस केन्द्रीय कार्य समितिको बैठकलाई कसरी हेर्नुभएको छ ?

झन्डै एक वर्षयता बैठक बस्न नसकिरहेको समयमा कांग्रेसको बैठक सुरु हुनुलाई राम्रै संकेत मान्नुपर्छ । लामो समयसम्म बैठकसमेत बस्न नसक्नु लज्जास्पद विषय हो । यो बैठकले कम्तीमा त्यसमा विराम लगाएको छ । पदाधिकारीले आआफ्ना प्रतिवेदन पेस गर्नुभएको छ । तिनमा छलफल पनि होला । त्यसैले, यसलाई राम्रै मान्नुपर्छ ।

कार्य समिति बैठकलाई ‘लाइभ’ गर्नुको अर्थ के हुन सक्छ ? 

सायद यो नेपालकै पहिलो अभ्यास हुन सक्छ । बैठकका गतिविधि लाइभ गरिएपछि देशभरका नेता, कार्यकर्ताले आआफ्ना क्षेत्रका नेतालाई देख्न, हेर्न र सुन्न पाए । आफूले चुनेर केन्द्रमा पठाएका नेताले कसरी बोल्छन्, के बोल्छन्, त्यो हेरेर तिनको मूल्यांकन गर्न सक्ने अवस्था बनेको छ ।

यसअघि बैठक लाइभ नभए पनि ‘सूत्र’बाट प्राप्त सूचना भनेर बैठकका गतिविधि सार्वजनिक हुने गरेकै थिए । त्यस्ता सूत्रका सूचनाले पार्टी गतिविधिको सन्देश गलत तरिकाले प्रवाहित भइरहेको थियो । नेताहरूले बैठकमा एक तरिकाले प्रस्तुत हुने र बाहिर अर्कै तरिकाले प्रस्तुत हुने ‘डबल स्ट्यान्डर्ड’ देखाइरहेका थिए । सायद, त्यसैको झोकले सभापतिजीले यो बैठक लाइभ गराउनुभएको हुन सक्छ ।

 यो बैठकले पार्टी जीवनलाई गति दिन सक्ने सम्भावना कति देख्नुहुन्छ ?

यसले पार्टीमा राम्रै सन्देश देला । एक किसिमले पार्टी जीवनमा हलचल ल्याउला । लाइभले गर्दा देश विदेशका कार्यकर्ता जोडिन पाएका छन् । यसले पार्टी जीवनमा केही न केही गति त अवश्यै ल्याउला । नयाँपत्रिका